Një grua dhe një vajzë 11-vjeçare janë shtruar sot në spital pasi u goditën me thikë në sheshin Leicester në qendër të Londrës, njoftoi policia, e cila arrestoi sulmuesin dhe sipas vlerësimeve fillestare mendon se nuk ishte një sulm terrorist.
“Oficerët janë në skenën e një sulmi me thikë në sheshin Leicester. Një burrë është arrestuar dhe është në paraburgim”, tha policia e Londrës.
“Dy viktimat, një vajzë 11-vjeçare dhe një grua 34-vjeçare janë dërguar në spital”, shtoi policia.
Policia tha se incidenti në sheshin qendror të Londrës, një zonë e njohur për turistët, nuk po trajtohej si terrorizëm, sipas Reuters.
Lëndimet janë jashtë rrezikut për jetën për vajzën dhe gruan
Forcat e policisë britanike mbeten në gatishmëri të lartë pas trazirave në fillim të këtij muaji, të cilat shpërthyen pas vrasjes së tre vajzave në veri të Anglisë. Shkak ishin postimet e rreme në internet që pretendonin se autori i vrasjes ishte një emigrant islamik.
Lëndimet e 11-vjeçares janë jashtë rrezikut për jetën, tha policia, duke shtuar se ajo ndodhet në spital, ndërsa 34-vjeçarja është plagosur lehtë dhe ka dalë nga spitali. Nuk kishte të dyshuar të tjerë, tha policia.
Mbajtja e armëve të zjarrit në MB është rreptësisht e kufizuar, por vendi po përballet me një rritje të dhunës me armë, ku autorët shpesh janë të rinj.
Sulmet e tilla u rritën me 7 për qind, në pothuajse 50,000, vitin e kaluar, krahasuar me vitin 2022, dhe në dhjetë vjet ato janë pothuajse dyfishuar, sipas Zyrës për Statistikat Kombëtare.
