Shkruan: Florim ZEQA
Kushtetuta dhe Rregullorja e Punës së Kuvendit i jep të drejt partisë fituese apo koalicionit parazgjedhor fitues që të propozojë kandidatin për Kryetar të Kuvendit, kurse partitë e tjera nuk e kanë të drejtën që t’ia rekomandojnë kandidatin, se cili bën e cili nuk bën të propozohet nga partia fituese.
Gracka në të cilën ranë të gjithë deputetët
Pra, askush nuk mund t’ia merr të drejtën ekskluzive partisë fituese kur është në pyetje zgjedhja e Kryeparlamentarit! Mirëpo partitë e tjera nuk duhet t’i përligjin gabimet që i bën pa vetëdije apo me rekomandim kryesuesi i seancës konstituive siç ndodhi herën e fundit (të hënën e 21 prillit), kur ai e mbylli seancën pa e konsumuar të drejtën e votimit të deputetëve, duke e paragjykuar votimin pro apo kundër kandidates në fjalë!
Të gjithë deputetët pa dallime partiake u bënë bashkëpjesëmarrës me vetëdije në shkeljen e rëndë kushtetuese të kryesuesit provizor, z. Avndi Dehari, i cili edhe mund të ketë gabuar pavetëdije siq e ceka në fillim! Kjo le të mbetet në ndërgjegjen e tij njerëzore!
Por, kjo ishte gracka në të cilën ranë të gjithë deputetët pa dallim!
Në fakt, kjo e dëshmon qëllimin që e kanë të gjitha partitë politike-atë të shkuarjes në zgjedhje të jashtëzakonshme e jo të gjetjes së zgjidhjes konsesuale për zhbllokimin e ngërçit politik për formimin e shpejtë të institucioneve të reja shtetërore!
Për këtë “naivitet” të koordinuar, të gjitha partitë politike pa dallim duhet të ndëshkohen në zgjedhjet eventuale të jashtëzakonshme, për faktin se asnjëra prej tyre nuk është duke e mbrojtur interesin e shtetit dhe të qytetarëve, por vetëm interesat meskine të liderëve partiak!
T’i respektojmë rregullat demokratike
Pa dyshim, gjëja më e turpshme që është duke ndodhur në këtë interval kohor të vakumit institucional, është gara e pashembullt e partive politike me akuza të ndërsjella për ‘bashkëpunim të këtij apo të atij lideri partiakë me Serbinë’!
Leni këto përralla të shëmtuara politike. Kosova është tepër e vogël për të bërë krahasime të tilla! Secili njihemi në njëfarë mënyre me secilin, andaj është e turpshme të veprohet me lojën e pandershme të “patriotit” dhe “tradhtarit”, ngase dihet mirëfilli kontributi i secilit në të gjitha etapat historike, duke filluar nga periudha e shtetformimit të viteve të ’90-ta, luftës së lavdishme çlirimtare dhe shtetndërtimit!
Të mësohemi ta dëgjojmë dhe ta respektojmë vullnetin e qytetarëve të dalë nga zgjedhjet e lira dhe demokratike. Cilën parti dhe cilin liderë e ka përzgjedhë populli ta respektojmë deri në zgjedhjet e radhës, siç e respektojmë zgjedhjen e secilit deputet pa dallime partiake.
