Zyra e Rregullatorit për Energji (ZRrE) ka reaguar me një sqarim publik pas deklaratave të dala në media lidhur me tarifat e energjisë elektrike, të bëra gjatë një takimi me deputetët e LDK-së. ZRrE tha se ndjen nevojën për të sqaruar publikun dhe për të ruajtur korrektësinë e informacionit që shpërndahet lidhur me proceset rregullative dhe vendimmarrjen për tarifat.
“ZRrE është institucion i pavarur, në kuadër të mandatit të dhënë me ligj, ka për detyrë rregullimin, mbikëqyrjen dhe monitorimin e sektorit të energjisë në Republikën e Kosovës”, thuhet në sqarim.
ZRrE thekson se një nga funksionet themelore të saj është shqyrtimi dhe miratimi i tarifave të energjisë, në përputhje me metodologjinë tarifore dhe parimet ligjore, si transparenca, drejtësia, jo-diskriminimi dhe qëndrueshmëria financiare e sistemit energjetik.
“Deklarimet se ‘vetëm qeveria mund ta shtyjë vendimin për shtrenjtimin e rrymës’ janë të pasakta dhe nuk qëndrojnë në përputhje me kornizën ligjore që rregullon sektorin e energjisë”, thuhet më tej në reagim.
ZRrE sqaron se vendimet për tarifat janë kompetencë ekskluzive e këtij institucioni dhe se asnjë institucion tjetër nuk ka mandat ligjor për t’i anuluar apo shtyrë ato. “Qeveria mund të ndikojë në uljen e ndikimit të faturave vetëm përmes mekanizmit të subvencionimit direkt te konsumatorët, por kjo nuk përbën vendimmarrje rregullative”, thekson ZRrE.
Sipas ZRrE-së, vendimet e saj nuk mund të rishikohen apo kontestohen nga asnjë institucion publik, përveç shqyrtimit gjyqësor në gjykatën kompetente, sipas Ligjit për Konfliktet Administrative.
Sa i përket kalimit të konsumatorëve komercialë në tregun e hapur të energjisë, ZRrE sqaron se ky proces buron nga obligimet për liberalizim të tregut, të përcaktuara në direktivat evropiane që janë pjesë e legjislacionit që nga viti 2016.
“Deri tani ky aktivitet është shtyer për shkak të pasojave të pandemisë dhe të krizës energjetike, të cilat krijuan pasiguri në furnizim me energji dhe stabilitet të tregut”, thuhet në njoftim. ZRrE thekson se tani janë plotësuar kushtet për të mundësuar këtë kalim për konsumatorët që përmbushin kriteret.
“ZRrE do të monitorojë çdo hap të këtij procesi, për të siguruar mbrojtjen e interesave të konsumatorëve dhe për të garantuar që të gjitha palët e përfshira të respektojnë normat dhe standardet ligjore në fuqi”, përfundon sqarimi.
