Të paktën 18 palestinezë janë vrarë nga të shtënat e ushtrisë izraelite pranë një qendre shpërndarjeje të ndihmës humanitare në Gaza, sipas zyrtarëve të spitalit.
Incidenti ndodhi në Korridorin Netzarim të kontrolluar nga Izraeli, pranë një objekti të drejtuar nga Fondacioni Humanitar i Gazës (GHF), raportoi të martën Spitali Al-Quds në qytetin e Gazës. Ushtria izraelite tha se po hetonte incidentin.
Agjencia palestineze e lajmeve WAFA raportoi se më shumë se 100 persona u plagosën. Në total, të paktën 23 palestinezë janë vrarë në sulme të ndryshme izraelite në të gjithë Rripin e Gazës që nga mëngjesi i hershëm i së martës, tha agjencia.
Ditët e fundit janë raportuar përleshje të tjera me viktimat pranë vendeve të shpërndarjes së ndihmave. GHF, një organizatë kontroverse e përfshirë në ndihmën humanitare në Gaza, ka akuzuar grupin islamist Hamas për ndërprerje të qëllimshme të shpërndarjes së ushqimit. Izraeli dhe Shtetet e Bashkuara e mbështesin fondacionin.
Izraeli hoqi bllokadën ndaj shpërndarjes së ndihmave në zonën e rrethuar muajin e kaluar. Që atëherë, GHF ka marrë përsipër shpërndarjen e furnizimeve, duke vepruar veçmas nga agjencitë e Kombeve të Bashkuara dhe përpjekjet e tjera humanitare ndërkombëtare.
OKB-ja kritikon vendndodhjen e qendrës
Në një deklaratë në Facebook, GHF njoftoi se kishte shpërndarë më shumë se 11.5 milionë vakte në të gjithë Gazën.
Kombet e Bashkuara dhe organizata të tjera humanitare kanë kritikuar përdorimin e qendrave të shpërndarjes së centralizuar, duke thënë se ato i vënë civilët në rrezik të shtuar sepse detyrohen të udhëtojnë nëpër zona aktive të konfliktit për të arritur tek ato.
Ndërkohë, autoritetet izraelite raportuan se militantët palestinezë në Gaza kishin qëlluar një raketë drejt Izraelit. Ajo u kap nga mbrojtja ajrore izraelite dhe u nis nga pjesa veriore e asaj enklave bregdetare. Përpara kapjes, u lëshua një alarm për raketa në zonën e Zikim, një kibuc izraelit.
Edhe pse mijëra raketa janë lëshuar nga Gaza që nga fillimi i luftës më shumë se 20 muaj më parë, sulme të tilla janë bërë shumë më të rralla.
