Tifozët e futbollit në Turqi janë “çmendur” pas Eysan Aksoy, prezantueses së emisionit të Ligës së Kampionëve, dhe e shfaqin rregullisht dashurinë e tyre për të në Instagram dhe ndjekin nga afër çdo lëvizje dhe paraqitje të saj publike. Megjithatë, ajo ka vetëm një “të metë” – ajo nuk ekziston.
Eysan Aksoy ka më shumë se 50,000 ndjekës në Instagram dhe mijëra njerëz e pëlqejnë çdo postim të saj.
Profili i saj u krijua më 5 shkurt të këtij viti dhe në foto shkruhej vetëm “Selam”, dhe më shumë se 3,000 njerëz e pëlqyen foton.
Çdo postim pasues merrte gjithnjë e më shumë pëlqime, dhe numri i ndjekësve në profilin e saj rritej dita-ditës, por gjithçka është në thelb një mashtrim.
Konkretisht, një person i panjohur krijoi imazhin e një femre tërheqëse duke përdorur teknologjinë e inteligjencës artificiale, dhe për ta bërë absurditetin edhe më të madh, edhe në përshkrimin e profilit të saj në Instagram shkruhet se është krijuar me ndihmën e inteligjencës artificiale, por kjo nuk i ndalon njerëzit t’i shkruajnë asaj mesazhe të shumta për t’u shoqëruar.
