Ministri në detyrë i Kulturës, Rinisë dhe Sportit, Hajrulla Çeku, ka përshëndetur fitoren e Kosovës ndaj Sllovenisë, duke thënë se me këtë ritëm dhe lojë e presin Zvicrën në Prishtinë dhe se ëndrra për Botëror vazhdon.
“3 pikë për Kosovën tonë! Me këtë ritëm dhe me këtë lojë, e presim Zvicrën në Prishtinë. Ëndrra vazhdon”, ka shkruar Çeku në rrjetet sociale.
Me fitoren 2:0 ndaj Sllovenisë në stadiumin “Stozhice” në Lubjanë, Kosova ka siguruar vendin në plej-ofin për Kampionatin Botëror 2026, që do të mbahet vitin e ardhshëm në Kanada, Meksikë dhe SHBA.
Golin e parë për Kosovën e shënoi Fisnik Asllani në minutën e gjashtë të ndeshjes, ndërsa rezultatin përfundimtar 2:0 e vendosi mbrojtësi Zhan Karniçnik me autogol në minutën e 64-t.
