Kryesuesi i Këshillit Prokurorial të Kosovës, Ardian Hajdaraj në një konferencë për media tha se ushtruesi i detyrës së kryeprokurorit të shtetit, Besim Kelemendi, u shkarkua nga detyra që mbante për shkak të qëndrimeve të njëanshme dhe denigruese ndaj Sistemit Prokurorial.
Sipas Hajdarajt, prononcimet e Kelmendit për media kanë zbehur ndjeshëm rolin unifikues që, Hajdaraj tha se i takon Kryeprokurorit të Shtetit, si dhe, sipas tij, ka cenuar besimin e publikut në Sistemin Prokurorial.
“Për këtë arsye kemi marrë vendimin për shkarkimin e tij nga kjo pozitë”, deklaroi kryesuesi i KPK-së në konferencë para gazetarëve.
Ai tha se në takimin e 20 nëntorit, që ishte i 278-ti me radhë, pesë anëtarë e lëshuan takimin në mënyrë të kundërligjshme.
“Ju jeni në dijeni që për shkak të këtyre arsyeve dhe arsyeve të tjera politike, Sistemi Prokurorial ka mbetur pa dekretimin e kryeprokurorit dhe me ushtrues detyre në këtë pozitë të rëndësishme për afro 4 vjet. Edhe sot, ritheksojmë që në përputhje me Kushtetutën e ligjet dhe rrethanat e krijuara nga veprimet e tij, kemi marrë vendim për shkarkimin e Kelmendit nga pozita që ushtronte dhe në vend të tij si ushtrues detyre kemi caktuar prokurorin Agron Qalaj që është prokuror në Zyrën e Kryeprokurorit të Shtetit.
Hajdaraj tha se mirëpret qasjen e Kelmendit që të ndjekë të gjitha rrugët ligjore për ta kontestuar ligjshmërinë e këtij vendimi.
“Ne duhet t’i besojmë sistemit tonë gjyqësor për vendimet që merr, përfshirë edhe këtë çështje, përndryshe tentimi për të penguar punën e dhe funksionimin e Këshillit Pokurorial përbën sulm të drejtpërdrejt në punën e këtij institucioni dhe kërcënim për rendin e sigurinë publike”.
Hajdaraj tha se Kelmendi si ushtrues detyre i Kryeprokurorit të Shtetit dhe si autoriteti më i lartë ka pasur detyrim e përgjegjësi për të ndjekur të gjitha rrugët ligjore e jo të dalë, siç tha ai, në konferencë për shtyp për të shfaqur, sipas Hajdarajt, pretendime për presion, shantazh apo forma të tjera joligjore të ndikimit që ka bërë ndaj një prokurori brenda sistemit.
