Ish-ministrja e Drejtësisë, Albulena Haxhiu, ka reaguar përmes një postimi në Facebook, duke kritikuar Këshillin Prokurorial të Kosovës (KPK) për kapje nga grupe interesi që sipas saj synojnë mbrojtjen e interesave personale dhe jo përmirësimin e sistemit prokurorial.
Haxhiu thekson se reforma e KPK-së, e cila pritet të realizohet në janar 2026, është e domosdoshme për rikthimin e integritetit në institucion. Sipas saj, që nga viti 2021, reformat kanë synuar heqjen e kontrollit të një rrethi të ngushtë, rritjen e transparencës dhe llogaridhënies, eliminimin e ndikimit të grupeve të interesit dhe forcimin e meritokracisë mbi lidhjet personale apo klanet.
“Shumicës së anëtarëve aktualë të KPK-së kjo reformë u ka penguar që nga dita e parë. Ata kanë përdorur çdo mjet për ta bllokuar, por nuk ia dolën dhe nuk do t’ia dalin, sepse drejtësia dhe interesi publik nuk mund të ndalen nga grupe të izoluara interesi”, shkruan Haxhiu.
Reforma në KPK pritet të hapë rrugën për një institucion që funksionon në shërbim të publikut dhe jo të individëve të privilegjuar.
