Presidenti i SHBA-së, Donald Trump, tha se Shtetet e Bashkuara së shpejti do të nisin sulme ndaj objektivave brenda Venezuelës , mes përshkallëzimit të tensioneve në Karaibe. Dhjetëra njerëz janë vrarë në javët e fundit, ndërsa ushtria amerikane kryen operacione në rajonin më të gjerë detar kundër anijeve që Uashingtoni pretendon se përdoren nga trafikantët e drogës .
” Do të fillojmë t’i kryejmë këto sulme në tokë “, tha ai gjatë një mbledhjeje të kabinetit. “Ne e dimë se ku jetojnë ata. Ne e dimë se ku jetojnë të këqijtë dhe do të fillojmë shumë shpejt .” “Kushdo që e bën këtë [trafik droge] dhe e shet atë në vendin tonë është një objektiv”, tha Trump.
Uashingtoni ka dërguar në Karaibe aeroplanmbajtësen më të madhe në botë ( USS Gerald R. Ford ), të shoqëruar nga shkatërrues, anije zbarkimi, një nëndetëse, mijëra marins dhe avionë luftarakë të përparuar, zyrtarisht si pjesë e operacionit antidrogë.
Të dielën, presidenti amerikan konfirmoi se kishte folur në telefon ditët e fundit me homologun e tij venezuelian, Nicolas Maduro , i cili e akuzon atë se po përpiqet ta rrëzojë atë në mënyrë që SHBA-të të kenë akses në rezervat e naftës së Venezuelës . Venezuela ka rezerva të mëdha nafte prej 303 miliardë fuçish, rreth një e pesta e rezervave botërore, sipas Administratës Amerikane të Informacionit për Energjinë.
Raporti i djeshëm i gazetës Miami Herald tha se gjatë një telefonate midis dy udhëheqësve, e cila me shumë gjasa ka ndodhur më 21 nëntor, Donald Trump dyshohet se i ka dhënë Nicolas Maduros një ultimatum , duke i kërkuar atij të largohej menjëherë nga pushteti . Sipas të njëjtit raport, udhëheqësi venezuelian refuzoi, ndërsa kërkoi “amnisti” për veten dhe aleatët e tij.
“Mund të shpëtosh veten dhe njerëzit më të afërt me ty, por duhet të largohesh nga vendi tani”, thuhet se tha Trump, duke i ofruar Maduros, gruas dhe djalit të tij një dalje të sigurt, por “vetëm nëse ai pranon të japë dorëheqjen menjëherë”.
