“Siç e kam thënë shumë herë, nuk na shkon kurrë ndërmend t’i marrim asgjë askujt. Do të bëjmë gjithçka që pronarët e kapitalit të tyre të mbeten pronarë të kënaqur. Dhe nëse funksionimi bëhet i pamundur, Serbia do të paguajë – siç u ka hije shteteve serioze dhe të mira.”
“Çdo gjë që miqtë tanë rusë besojnë se mund të bëjmë për të siguruar që NIS të vazhdojë të funksionojë normalisht, e kemi bërë deri më tani dhe do të vazhdojmë ta bëjmë në të ardhmen. Kam frikë se nuk është aq e thjeshtë sa duket, por nëse ata kanë ide konkrete, ne jemi të gatshëm t’i dëgjojmë”, tha Presidenti serb Aleksandar Vuçiç.
Pas mesazhit të Sergey Lavrov, ai përsëriti se Serbia nuk ka ndërmend të prekë pronën e të tjerëve.
Vuçiç, duke iu përgjigjur një pyetjeje nga një gazetar në Nish për të komentuar deklaratën e Lavrovit se nuk mund të ketë shtetëzim të NIS pa pëlqim të ndërsjellë, se po këmbëngulet për një zgjidhje që do të nënkuptonte që NIS do të vazhdonte të vepronte, por që sanksionet e SHBA-së do të anashkaloheshin, dhe pyetjes se çfarë mund të nënkuptojë kjo, tha: “Shkëlqyeshëm, nëse mundet. Mezi presim.”
Ai theksoi se Serbia nuk do të lejojë veten të mbetet pa infrastrukturë kyçe energjetike.
“Serbia pa naftë, pa NIS dhe pa rafineri – kjo nuk do të ndodhë. I uroj palës ruse shumë suksese dhe ne do të ndihmojmë me gjithçka që mundemi. Thjesht nuk mendoj se një zgjidhje do të gjendet lehtë.”
Vuçiç shtoi se institucionet ndërkombëtare i vlerësojnë pozitivisht perspektivat e Serbisë, por se fokusi tani duhet të mbetet në sektorin e energjisë.
“FMN-ja dhe Banka Botërore parashikojnë se në pesë vitet e ardhshme do të jemi ekonomia me rritjen më të shpejtë në rajon. Por së pari duhet ta zgjidhim këtë situatë energjitike – pas kësaj gjithçka tjetër do të jetë më e lehtë”, përfundoi Vuçiç.
Kujtojmë se Ministri i Jashtëm rus Sergei Lavrov deklaroi se është duke u zhvilluar një proces negociatash në lidhje me kompaninë NIS.
Marrëveshja ndërqeveritare midis Serbisë dhe Rusisë thotë se asnjë shtetëzim nuk mund të ndodhë pa pëlqimin e ndërsjellë, tha ministri rus.
