Përplot nxënës të shkollave fillore, mësues e mysafirë të shumtë ishte salla e Bibliotekës Kombëtare të Kosovës aty ku u ndanë çmimet për fituesit e Konkursit Nacional “Ide të ndritshme për një të ardhme të gjelbër”, e organizuar nga Fondi i Kosovës për Efiçiencë të Energjisë.
Ata thanë se zyrat e tyre për një muaj rresht u mbushën me mesazhe, ide fantastike e shumë ngjyra.
Ideatori i këtij konkursi, drejtori menaxhues i Fondit të Kosovës për Efiçiencë të Energjisë, Driton Hetemi, tha se ky konkurs që u organizua për herë të parë është një nga aktivitetet më të rëndësishme edukative.
“Kjo garë u organizua, sepse efiçienca e energjisë dhe energjia e ripërtritshme nuk janë vetëm terma teknik, janë pjesë e mënyrës se si duhet të jetojmë, të planifikojmë dhe të ndërtojmë të ardhmen. Ndryshimi fillon pikërisht prej moshës tuaj”, u tha nxënësve ai.
Ministra në detyrë e Ekonomisë, Artane Rizvanolli, derisa foli për rëndësinë e kursimit të energjisë, kujtoi kohën kur ajo ishte vogël. Tha se fillimisht ishte gjyshi i saj që kujdesej për kursimin e energjisë e më vonë babai, e këtë fakt e lidhi edhe me vendin nga vjen.
“Kjo sigurisht që ka të bëjë me faktin që prejardhjen e kam prej Gjakovës, por jo vetëm”, ishte deklarata e ministres në detyrë Rizvanolli e cila nxiti të qeshura tek mysafirët.
Aty, ajo pranoi edhe një tjetër fakt. “Më duhet ta pranoj që fatkeqësisht derisa jam bërë ministre dhe jam përballur veçanërisht me krizën energjetike e krejt problemet e sistemit energjetik, kam filluar të shoh me të vërtetë rëndësinë e kursimit të energjisë”, tha ajo.
Rizvanolli përmendi punën e vështirë që e bëjnë punëtorët në KEK. Për tu çmuar puna e tyre, ajo tha se energjia duhet të shpenzohet me kujdes.
Juritë e caktuara për 3 kategoritë thanë se puna e tyre nuk ishte e lehtë.
Në mesin e 81 eseve, çmimin e parë e fitoi Erion Veliqi nga shkolla “Isamil Qemali” në Prishtinë, çmimin e dytë Reina Hasanaj nga Shkolla “Xhemajl Kada” në Pejë, ndërsa të tretin, Sara Kryeziu, nga shkolla “Emin Duraku” në Prizren.
Në kategorinë për instilacion kreativ, vendin e parë e fitoi Aldin Bushi nga shkolla “Ilaz Thaçi” nga Hani i Elezit, vendin e dytë, Qëndresa Ismali nga shkolla “Avdyl Frashëri” në Vushtri e të tretin, Alina Selamnaj nga shkolla “Dëshmorët e Baballoqit” në Deçan.
Në kategorinë për vepër artistike, çmimi i parë shkoi për Leart Ismailin nga shkolla “SHMU2” në Vushtrri. Po në këtë shkollë shkoi edhe çmimi i dytë që e fitoi nxënësja, Meliza Pushkolli, ndërsa çmimi i tretë iu nda Yllka Haxhollit nga shkolla ‘Dituria” në Prishtinë.
