Komisioni Qendror i Zgjedhjeve ka publikuar rezultatet e zgjedhjeve të parakohshme për Kuvendin e Kosovës, të mbajtura më 28 dhjetor, sipas të cilave Lëvizja Vetëvendosje ka dalë fituese me shumicën e votave dhe ulëseve në Kuvend.
Zëdhënësi i Komisionit Qendror të Zgjedhjeve (KQZ), Valmir Elezi, ka njoftuar se në orët e hershme të mëngjesit të së premtes, më 9 janar 2026, është përmbyllur numërimi i pjesës së fundit të fletëvotimeve nga votimi me postë jashtë Kosovës.
Sipas Elezit, procesi i numërimit në Qendrën e Numërimit dhe Rezultateve (QNR) ka përfunduar rreth orës 02:00, duke shënuar kështu përmbylljen e plotë të numërimit të të gjitha fletëvotimeve nga zgjedhjet e parakohshme për Kuvendin e Republikës së Kosovës, të mbajtura më 28 dhjetor 2025.
Me përfundimin e këtij procesi, KQZ ka bërë të ditur se është e gatshme për shpalljen e rezultateve përfundimtare të zgjedhjeve. Megjithatë, sipas Ligjit për Zgjedhjet e Përgjithshme, subjektet politike kanë të drejtë të parashtrojnë ankesa në Panelin Zgjedhor për Ankesa dhe Parashtresa (PZAP) lidhur me administrimin e procesit të numërimit në QNR, brenda afatit prej 48 orësh nga ndodhja e shkeljes së supozuar.
Përfundon numërimi i votave, LVV-ja fituese me 51.11 për qind
Komisioni Qendror i Zgjedhjeve ka publikuar rezultatet e zgjedhjeve të parakohshme për Kuvendin e Kosovës, të mbajtura më 28 dhjetor, sipas të cilave Lëvizja Vetëvendosje ka dalë fituese me shumicën e votave dhe ulëseve në Kuvend.
Në Qendrën e Numërimit dhe të Rezultateve (QNR) ka përfunduar edhe numërimi i pjesës së dytë të fletëvotimeve që i takojnë votimit jashtë Kosovës, përkatësisht votimit përmes postës.
Pra grupi i fundit i fletëvotimeve që u numëruan ishin ato me postë, numërimi i të cilëve përfundoi në orën 02:00 të 9 janarit.
Sipas zëdhënësit të KQZ-së, Valmir Elezi, me përfundimin e numërimit të këtyre votave, përmbyllet i gjithë procesi i numërimit të fletëvotimeve.
Lëvizja Vetëvendosje, ka fituar 57 ulëse, me 51.11 për qind të votave, apo gjithsej 486,994 vota.
Partia Demokratike e Kosovës (PDK) është renditur e dyta me 22 ulëse, duke marrë 20.19 për qind të votave, apo 192,407 vota.
Kurse Lidhja Demokratike e Kosovës (LDK) ka siguruar 15 ulëse, me 13.23 për qind të votave, përkatësisht 126,102 vota.
Aleanca për Ardhmërinë e Kosovës (AAK) ka fituar 6 ulëse, me 5.50 për qind të votave, apo 52,370 vota.
Lista Serbe (Srpska Lista) ka siguruar ulëset e rezervuara për komunitetin serb në Kuvendin e Kosovës.
Me këto rezultate, Kuvendi i Kosovës përbëhet nga 120 deputetë, përfshirë edhe ulëset e garantuara për komunitetet joshumicë.
Në zgjedhjet e 28 dhjetorit morën pjesë 45 për qind e trupit votues.
