Nga Musa Kurhasku Gjakovë, shkurt 2026
Në një kohë kur qytetet përballen çdo ditë me sfida të shumta urbane, shëndetësore dhe institucionale, angazhimi i pandalshëm në mbrojtje të rendit publik dhe interesit qytetar bëhet themel i funksionimit të një komune moderne. Në çdo cep të Gjakova, puna e përkushtuar e Drejtorisë Komunale të Inspektoratit ka qenë dhe mbetet një shtyllë e rëndësishme në luftimin dhe parandalimin e dukurive negative që cenojnë cilësinë e jetës së qytetarëve. Nga kontrolli i standardeve sanitare, ruajtja e hapësirave publike, e deri te mbikëqyrja e sektorëve të tjerë vitalë për funksionimin e qytetit, kjo drejtori ka dëshmuar seriozitet institucional dhe përgjegjësi të lartë profesionale. Në kuadër të Drejtorisë së Inspeksionit Komunal të Gjakovës funksionojnë disa sektorë të rëndësishëm, të cilët kanë për detyrë mbikëqyrjen dhe zbatimin e ligjshmërisë në fusha të ndryshme të jetës publike dhe veprimtarive ekonomike në territorin e komunës. Këta sektorë përfshijnë: Sektorin e Inspeksionit të Ndërtimit, i cili mbikëqyr zbatimin e ligjit në fushën e ndërtimeve, kontrollon lejet ndërtimore dhe ndërmerr masa ndaj ndërtimeve pa leje; Sektorin e Inspeksionit të Ambientit, që kujdeset për mbrojtjen e mjedisit, menaxhimin e mbeturinave dhe parandalimin e ndotjes; Sektorin e Inspeksionit Sanitar, që mbikëqyr kushtet higjieno-sanitare në hapësira publike dhe veprimtari afariste; Sektorin e Inspeksionit të Tregut, që kontrollon ushtrimin e veprimtarive tregtare në përputhje me legjislacionin në fuqi; Sektorin e Inspeksionit të Komunikacionit, që mbikëqyr rregullin dhe sigurinë në komunikacionin rrugor në nivel lokal; Sektorin e Inspeksionit të Shërbimeve Publike, i cili kontrollon funksionimin dhe mirëmbajtjen e infrastrukturës publike dhe ofrimin e shërbimeve për qytetarët. Përmes këtyre sektorëve, Drejtoria e Inspeksionit Komunal synon të sigurojë rend, ligjshmëri dhe standarde të nevojshme për një jetë më të mirë dhe më të sigurt për të gjithë qytetarët. Nën drejtimin e Ervin Shabanit në Drejtorinë Komunale për Inspektorat i është dhënë një frymë e re veprimi, e mbështetur në profesionalizëm, etikë dhe vendosmëri në zbatimin e ligjit. Si ish kandidat për kryetar të komunës nga Partia Demokratike e Kosovës, ai përfaqëson një kuadër universitar me përgatitje të lartë edukative, kulturore dhe profesionale, duke reflektuar integritet jo vetëm në detyrën publike, por edhe në dimensionin familjar e shoqëror. Angazhimi i tij i vazhdueshëm në forcimin e rendit dhe disiplinës institucionale ka kontribuar drejtpërdrejt në përmirësimin e standardeve të jetesës në qytetin tonë, duke dëshmuar se përkushtimi, transparenca dhe përgjegjësia janë parakusht për zhvillimin e qëndrueshëm dhe mirëqenien e përgjithshme të komunitetit.
