Ministri i Punëve të Brendshme, Xhelal Sveçla, ka njoftuar se janë gjetur armë, pajisje ushtarake dhe granata dore në veri të vendit.
Përmes një postimi, ai tregoi se ato janë zbuluar në dy lokacione të ndryshme në Zubin Potok.
“Beteja kundër çdo celule terroriste nuk ndalet. Si dje, edhe sot. Sërish, në dy lokacione në komunën e Zubin Potokut u gjet armatim, granata dore dhe pajisje të tjera ushtarake. Nga kushtetutshmëria cep më cep, te kontrolli pëllëmbë për pëllëmbë. Nuk do të ndalemi deri në çrrënjosjen totale të secilit element kriminal”, ka shkruar Sveçla në Facebook.
