Në vitin 2026, Ballkani Perëndimor mund të humbasë mbi 700 milionë euro nga BE-ja
Komisionerja evropiane për zgjerimin, Marta Kos, u ka dërguar një letër liderëve të vendeve të Ballkanit Perëndimor me paralajmërimin se mund të humbasin gjithsej deri në 750 milionë euro nga Plani i Rritjes, raportojnë mediat rajonale dhe BTA.
“Deri në këtë moment mbi 700 milionë euro janë në rrezik të humbasin përfundimisht në rajon, nëse reformat nuk përfundojnë deri në qershor 2026 ose dhjetor 2026”, tha Kos para Komisionit të Jashtëm të Parlamentit Evropian.
Deri në fund të vitit, Shqipëria rrezikon të humbasë 67,7 milionë euro, Mali i Zi – 15,1 milionë, Kosova – 68,8, Maqedonia e Veriut – 49,2, ndërsa Serbia mbi 110 milionë.
Plani i Rritjes parashikon dhënien e gjithsej 6 miliardë eurove për shtetet e Ballkanit Perëndimor pasi të kenë kryer reforma të caktuara.
Robert Golob
Ish-kryeministri Janez Jansha mund të drejtojë qeverinë e re të Sllovenisë
Fituesi i zgjedhjeve parlamentare në Slloveni më 22 mars – “Lëvizja Liri” liberale e kryeministrit aktual Robert Golob – nuk arriti të formojë qeveri koalicioni dhe mbetet në opozitë, transmeton BGNES. Golob i deklaroi presidentes Natasha Pirc Musar se nuk mund të sigurojë shumicë në parlamentin me 90 vende.
“Lëvizja Liri” ka vetëm 29 deputetë. Partia Demokratike Sllovene e djathtë e ish-kryeministrit Janez Janša ka 28 deputetë. Zoran Stevanović nga blloku sovranist “Resnica” u zgjodh kryetar i parlamentit me 48 vota. Tani vëzhguesit presin që Janša të arrijë të krijojë një kabinet koalicioni. Nëse brenda një muaji parlamenti slloven nuk formon qeveri, do të ketë zgjedhje të reja.
FOTO: romania-insider.com
Për shkak të masave të kursimit u kërkua dorëheqja e kryeministrit rumun
Rumania ndodhet në krizë politike, pasi partia më e madhe nga katër partitë në koalicionin qeverisës kërkoi dorëheqjen e kryeministrit Ilie Bolojan. Lideri i socialdemokratëve, Sorin Grindeanu, njoftoi se vendimi është marrë me pothuajse shumicë të plotë në votimin e brendshëm partiak. Të majtët janë kundër masave të kursimit të Bolojanit. Për shkak të deficitit të lartë buxhetor,
Bolojan dëshiron të rrisë taksat, të ngrijë pensionet dhe pagat shtetërore. Pasi ministrat socialistë u larguan nga kabineti, kryeministri Bolojan, i cili është lider i Partisë Nacional-Liberale, deklaroi se do të përpiqet të formojë një qeveri minoritare.
Pas konsultimeve me partitë, presidenti Nicușor Dan i ftoi ato “të shohin më shumë drejt zgjidhjeve sesa drejt problemeve”, transmeton Digi24.
FOTO: savremenapolitika.com
BE-ja fillon hartimin e traktatit për anëtarësimin e Malit të Zi
Ambasadorët e vendeve anëtare në BE miratuan krijimin e një grupi pune që të fillojë përgatitjen e Traktatit të Anëtarësimit të Malit të Zi. Këtë e njoftoi ministrja malazeze për çështjet evropiane, Maida Gorčević, informon agjencia MINA.
Vendimi është një njohje për përparimin e Podgoricës dhe një shtysë për përshpejtimin e reformave, tha komisionerja për zgjerimin Marta Kos. Në rrjetin social “X” ajo shkroi: “Vendi i Malit të Zi në BE tani po fillon të marrë formë. Ky është një hap i madh në rrugën drejt anëtarësimit”.
Kos shtoi se janë nxjerrë mësime nga zgjerimet e mëparshme të BE-së dhe traktatet e anëtarësimit do të përfshijnë mekanizma të rinj dhe më të fortë mbrojtës, për të parandaluar ngecjen në fushën e sundimit të ligjit dhe vlerave themelore.
Ohrid
Ohri tashmë është në hartën e destinacioneve kulturore evropiane
Ohrid u bë pjesë e Rrugëve Kulturore Evropiane të Këshillit të Evropës.
Vendimi u mor në mbledhjen e Asamblesë së Përgjithshme të Këshillit në Akvileia, Itali. Kjo është një njohje për rolin historik dhe qytetërues të Ohrit, i lidhur me veprën e shenjtorëve vëllezërit Kirilli dhe Metodij dhe nxënësve të tyre, tha kryetari i këshillit komunal Perço Bozhinovski, i cili mori pjesë në asamble, transmeton vecer.press.
“Anëtarësimi në Rrugët Kulturore Evropiane hap mundësi të reja për bashkëpunim ndërkombëtar, shkëmbim kulturor dhe zhvillim të turizmit kulturor, me çka Ohri do të afirmohet si një destinacion i njohur evropian”, shtoi Bozhinovski dhe njoftoi se komuna po përgatit një festim të madh për 24 maj – Ditën e shenjtorëve iluministë Kirilli dhe Metodij.
