Loriana Kuka ka fituar edhe një medalje të bronztë në garat e nivelit Grand Slam, që janë prej më të vlerësuarave në xhudo. Të dielën, Loriana garoi në kategorinë deri 78 kilogramë në Grand Slamin në Baku të Azerbajxhanit. Për medalje të bronztë e mposhti britaniken Emma Reid, që ishte bartësja e pestë. Loriana ishte bartësja e shtatë. Ndaj Reidit fitoi me mbërthim në kohën shtesë. Aksioni i saj ishte impresiv. Xhudistja kosovare e nisi ditën me fitore ndaj gjermanes Teresa Zenker. Me të është përballur për herë të parë, ndërsa fitoi me “Ippon”.
Në çerekfinale, Loriana e kaloi holandezen Guusje Steenhuis, që ishte bartësja e dytë. Steenhuis është garuese me përvojë, me dy medalje botërore dhe shumë evropiane. Ndaj saj Loriana kishte dy humbje në të kaluarën. Por realizoi dy aksione për uazari dhe për fitore të madhe. Në gjysmëfinale, xhudistja pejane kishte përballë një holandeze tjetër, Natascha Ausma. Ausma realizoi herët hedhje për uazari. Më pas Kuka kërkoi përmbysjen, por pa sukses. Ausma pësoi dy dënime, kurse Loriana Kuka në fund protestoi, duke pretenduar se holandezja është dashur të dënohet për herë të tretë për dalje nga tatami. Por gjyqtari mendoi ndryshe dhe kështu Ausma kaloi në finale, ndërsa Kuka mbeti të luftoi për medalje të bronztë, të cilën më pas edhe e fitoi. Me Ausman, Loriana ka pesë humbje tashmë. Ajo ishte bartësja e gjashtë.
Me britaniken Reid, Loriana ka tri fitore. Të gjitha kundërshtaret e xhudistes kosovare ishin lartë të renditura. 25-vjeçarja Kuka para dy javësh fitoi medalje të bronztë edhe në Grand Slamin në Abu Dabi. Janë këto dy sukseset më të mëdha të Lorianës në këtë vit. Ajo po kthehet gradualisht në nivelin më të lartë pas telasheve që i kishte me lëndime.
Në Baku medalje të bronztë ka fituar edhe Nora Gjakova, të premten. Nora e Loriana ishin xhudistet e vetme të Kosovës që garuan në këtë garë.
