Departamenti Amerikan i Shtetit ka njoftuar se do të fillojë konfiskimin e pasaportave të qytetarëve amerikanë që u detyrohen shuma të mëdha mbështetjeje për fëmijët.
Departamenti i Shtetit tha se masa mund të prekë prindërit që kanë borxhe mbi 2,500 dollarë për mbështetjen e fëmijëve, me fokus tek ata me borxhe të konsiderueshme të papaguara. Departamenti thotë se po përdor mjete të arsyeshme për të mbështetur familjet amerikane dhe për të forcuar respektin për ligjin amerikan, dhe se ka të bëjë me përmbushjen e detyrimeve ligjore dhe morale të prindërve ndaj fëmijëve të tyre.
Qytetarëve me borxhe të tilla u këshillohet të bëjnë marrëveshje për shlyerjen e borxhit me agjencitë përkatëse qeveritare për të shmangur konfiskimin e pasaportave të tyre. Pasi të konfiskohet një pasaportë, ajo nuk mund të përdoret më për udhëtime. Personat, pasaportat e të cilëve janë konfiskuar, nuk do të jenë në gjendje të marrin një të re derisa të paguajnë borxhin e pensionit ushqimor, tha Departamenti i Shtetit.
Masa u bë e mundur nga një ligj federal i vitit 1996.
“Kjo masë mbështet mirëqenien e fëmijëve amerikanë duke parashikuar pasoja reale për mospagimin e mbështetjes për fëmijët, në përputhje me ligjin federal ekzistues”, tha departamenti. Sekuestrimi i pasaportave për mbështetje të papaguar për fëmijët prej më shumë se 2,500 dollarësh lejohet nga një ligj federal i vitit 1996 që rrallë është zbatuar.
Deri më tani, kjo masë është zbatuar kryesisht vetëm kur njerëzit me borxhe janë përpjekur të rinovojnë pasaportat e tyre. Sipas politikës së re, Departamenti i Shtetit do të bashkëpunojë me Departamentin e Shëndetësisë dhe Shërbimeve Njerëzore të SHBA-së për të identifikuar njerëzit me borxhe të papaguara dhe për të revokuar pasaportat e tyre.
Departamenti nuk tha se kur do të hynte zyrtarisht në fuqi masa, por Associated Press raporton se pritet të fillojë sot. Qytetarët, pasaportat e të cilëve konfiskohen ndërsa ndodhen jashtë Shteteve të Bashkuara, do të duhet të shkojnë në një ambasadë ose konsullatë amerikane për të marrë një dokument udhëtimi emergjence që do t’u lejojë atyre të kthehen në vend, sipas AP.
