Nuk ndalen protestat në Shqipëri kundër ndërtimit në zonat e mbrojtura
Mijëra qytetarë shqiptarë po protestojnë çdo mbrëmje në Tiranë për të shprehur kundërshtimin e tyre ndaj një projekti ndërtimi në zona të mbrojtura të bregdetit jugor shqiptar, në zonën e Zvërnecit (Qarku i Vlorës), njofton BTA. Protestuesit mblidhen në sheshin “Skënderbej” në qendër të kryeqytetit, duke kërkuar anulimin e projektit dhe dorëheqjen e kryeministrit Edi Rama.
Nga ana e tij, kryeministri Edi Rama deklaroi në një intervistë televizive, të cituar nga Radio Televizioni Shqiptar, se projekti për një resort luksoz në Zvërnec do të vazhdojë pavarësisht protestave dhe debatit publik. Ai theksoi se një investim i tillë prej 4 miliardë eurosh në një vend me një Prodhim të Brendshëm Bruto (PBB) prej rreth 27 miliardë eurosh ka një peshë të madhe ekonomike dhe flet vetë për rëndësinë e tij.
Resorti është një projekt i lidhur me Jared Kushner, dhëndrin e presidentit amerikan Donald Trump. Pakënaqësia e banorëve vendas lidhet me faktin se ndërtimi parashikohet pranë zonës së mbrojtur Vjosa-Narta, e cila është habitat i qindra llojeve të shpendëve, përfshirë flamingon rozë, si dhe i fokës mesdhetare murg, një specie në rrezik kritik zhdukjeje. Gjithashtu, zona përfshin plazhe ku folenizojnë breshkat detare, thekson birdlife.org.
Aleksandër Vuçiç
FOTO: EPA/BGNES
Presidenti serb Vuçiç planifikon të japë dorëheqjen
Presidenti i Serbisë, Aleksandër Vuçiç, njoftoi se po planifikon të japë dorëheqjen. Ai e bëri këtë deklaratë në një intervistë për televizionin publik serb RTS. “Kam ndërmend të jap dorëheqjen, do t’ju njoftoj se kur. Nuk do të ketë surpriza për askënd”, tha Vuçiç. Ai shtoi se po shqyrton se kush do të jetë kandidati për president nga partia e tij, Partia Përparimtare Serbe. Sipas tij, bëhet fjalë për një kandidat që me siguri do të dalë fitues.
Duke komentuar protestat e vazhdueshme studentore, Vuçiç tha se i kupton të rinjtë, por akuzoi kundërshtarët e tij politikë se u përpoqën të shfrytëzojnë pakënaqësinë e tyre për qëllime politike. Ai pretendoi se autoritetet penguan përpjekjet për “minimin e rendit kushtetues” dhe hodhi poshtë pretendimet për përdorimin e një arme zanore kundër protestuesve, duke i cilësuar ato si të pavërteta.
Protestat studentore në Serbi nisën pas shembjes së një strehe prej betoni në stacionin hekurudhor të Novi Sadit më 1 nëntor 2024, ku humbën jetën 16 persona.
FOTO: cyprus-mail.com
Qendër energjetike do të ndërtohet në Mesdheun Lindor
Qiproja, Greqia, Izraeli dhe SHBA-ja (i ashtuquajturi format bashkëpunimi 3+1) po krijojnë një qendër energjetike në Mesdheun Lindor, njofton korrespondentja e BNR në Qipro, Branisllava Bobanac. Struktura e re rajonale krijohet mbi bazën e Ligjit për Mesdheun Lindor (Eastern Mediterranean Security and Energy Partnership Act), me të cilin në vitin 2019 Uashingtoni formalizoi partneritetin e tij strategjik me Qipron, Greqinë dhe Izraelin.
Qendra energjetike e Mesdheut Lindor do të jetë një platformë e përhershme transatlantike për bashkëpunim në fushën e energjisë, teknologjisë, inovacionit dhe kërkimeve shkencore, duke bashkuar institucione dhe kompani nga sektori publik dhe privat, bëjnë të ditur nga Ministria e Energjetikës. Ajo do të ketë gjithashtu një rol të rëndësishëm gjeopolitik si mekanizëm për analizë strategjike të situatës në rajon.
Plazhi Vutumi në ishullin Antipaksos
FOTO: sail2day.com
Pesë plazhe greke në Top 10 të Evropës
Pesë plazhe në Greqi renditen ndër dhjetë më të mirët në Evropë sipas faqes europeanbestdestinations.com. Këto janë plazhet: Vutumi, me ujërat e tij kristal të kthjellëta në ngjyrë bruz dhe guralecët e imët të bardhë në ishullin Antipaksos (Deti Jon) – në vendin e 2-të; Fteri në ishullin Kefalonia (Deti Jon), i njohur për qetësinë dhe bukurinë natyrore të paprekur – në vendin e 3-të; Elafonizi në ishullin Kretë, i famshëm për rërën rozë dhe ujërat e cekëta të pastra – në vendin e 4-t; plazhi i izoluar me guralecë Rovinia, i rrethuar nga gjelbërimi i dendur dhe shkëmbinjtë, në vendin e 8-të; si dhe plazhi piktoresk Paleokastrica në ishullin Korfuz, në vendin e 10-të të renditjes.
Renditja është përgatitur pas shqyrtimit të qindra plazheve, bazuar në bukurinë natyrore, cilësinë e ujit, aksesueshmërinë, përshtatshmërinë për familje, autenticitetin, mbrojtjen e mjedisit, shërbimet në plazh, cilësinë e akomodimit në afërsi dhe atmosferën e përgjithshme. Pas përzgjedhjes së 30 plazheve nga ekspertët, dhjetë fituesit u përcaktuan me votat e udhëtarëve dhe turistëve nga e gjithë bota.
