Britania e Madhe dhe Japonia kanë arritur një marrëveshje mbi një paketë investimesh prej disa miliardë paundësh, të cilën kryeministri britanik, Sir Keir Starmer, e quajti një “epokë të re bashkëpunimi” midis dy vendeve.
Siç njoftoi Downing Street përpara takimit të Kryeministrit me homologun e tij japonez Sanae Takaichi në Londër, kompanitë japoneze do të investojnë më shumë se 9 miliardë paund në infrastrukturën dhe shërbimet financiare britanike dhe deri në 9 miliardë paund në parqet eolike britanike në det të hapur, të cilat duhet të krijojnë dhjetëra mijëra vende pune, raporton BBC .
Marrëveshja vjen në një kohë kur ekonomia britanike përballet me sfida rritjeje dhe ekspertët parashikojnë se një luftë midis SHBA-së, Izraelit dhe Iranit do ta godasë Britaninë veçanërisht rëndë. Ende nuk është e qartë se sa nga investimet që Downing Street ka përmendur është kapital i ri dhe sa lidhet me planet e shpallura më parë.
Takaichi: Britania është një partner jashtëzakonisht i rëndësishëm
Sir Keir dhe Takaichi u takuan sot me drejtuesit e kompanive japoneze në Downing Street, me Starmer që i përshkroi bisedimet si “shumë produktive”. Kryeministri shprehu gjithashtu kënaqësi të madhe që të dy vendet kishin konfirmuar angazhimin e tyre ndaj programit të përbashkët të zhvillimit të avionëve luftarakë Gcap, në të cilin merr pjesë edhe Italia.
Ndërkohë, u njoftua se Rolls-Royce do të bashkëpunojë me Agjencinë Japoneze të Energjisë Atomike për të zhvilluar teknologji bërthamore të gjeneratës së ardhshme. Marrëveshja teknologjike synon të lidhë ekspertizën britanike në kërkim, zhvillim dhe softuer me kapacitetin prodhues japonez.
Kryeministri japonez, nëpërmjet një përkthyesi, tha se Britania ishte një “partner jashtëzakonisht i rëndësishëm”. Downing Street tha se Mitsubishi Estate, Mitsui Fudosan dhe Nomura Real Estate ishin ndër kompanitë japoneze që ishin zotuar të investonin miliarda në projekte infrastrukture dhe pasurish të paluajtshme gjatë pesë viteve të ardhshme.
Jo të gjithë janë optimistë.
Andrew Griffith, sekretari konservator i biznesit dhe tregtisë në hije, tha se partia e tij mirëpret “çdo marrëveshje që sjell investime” në Britani. Megjithatë, ai shtoi se “rritja e taksave dhe burokracisë nga Partia Laburiste për punëdhënësit po shkakton dëme të mëdha, duke shkatërruar vende pune dhe duke shtyrë më shumë njerëz drejt ndihmës sociale”.
Edhe pse Downing Street thotë se marrëveshja do të nxisë vendet e punës dhe rritjen afatgjatë, ekspertët presin vështirësi ekonomike në afat të shkurtër. Ekonomia e Britanisë u rrit me 0.6% në tre muajt e parë të këtij viti, por analistët besojnë se rritja do të ngadalësohet në muajt në vijim.
Fondi Monetar Ndërkombëtar (FMN) njoftoi muajin e kaluar se një luftë midis SHBA-së, Izraelit dhe Iranit pritet ta godasë Britaninë më rëndë nga të gjitha ekonomitë më të zhvilluara të botës. Në të njëjtën kohë, Banka e Anglisë paralajmëroi se për shkak të luftës, pret një rritje të inflacionit në Britani, i cili mund të arrijë në 6% në skenarin më të keq.
