Kremlini tha të mërkurën se mbështet përpjekjet e Serbisë për të mbrojtur serbët etnikë në veri të Kosovës, por hodhi poshtë akuzat e Prishtinës se Rusia po nxiste tensione për të mbjellë kaos në Ballkan.
I pyetur lidhur me deklaratat e ministrit të Punëve të Brendshme të Kosovës, Xhelal Sveçla, se Serbia, nën ndikimin e Rusisë, po synon të destabilizojë Kosovën, zëdhënësi i Kremlinit, Dmitry Peskov tha se “është krejtësisht e gabuar” që të flitet për ndikimin destruktiv rus.“Serbia është një shtet sovran dhe është absolutisht e gabuar të kërkosh ndikimin shkatërrues të Rusisë në këtë”, tha Peskov.
Kremlini tha se mbështet lëvizjet e Serbisë.
“Duke pasur marrëdhënie shumë të ngushta aleate, marrëdhënie historike dhe shpirtërore me Serbinë, Rusia monitoron me shumë kujdes se çfarë po ndodh, si respektohen dhe sigurohen të drejtat e serbëve”, tha Peskov.
“Dhe sigurisht që ne mbështesim Beogradin në veprimet që po ndërmerren,” shtoi ai.
Ministri Sveçla deklaroi më 27 dhjetor se Serbia është ndikuar nga Rusia kur ka marrë vendimin që të rrisë në nivelin më të lartë gatishmërinë luftarake të forcave ushtarake dhe policore.
“Deklarimet se Republika e Kosovës ka ngritur gjendje gatishmërie janë tërësisht të pavërteta dhe janë pjesë e propagandës së dyshes Serbi- Rusi”, tha ai, duke hedhur poshtë pretendimet e zyrtarëve serbë se Kosova po ashtu ka rritur nivelin e gatishmërisë luftarake.
Ndryshe, Rusia është aleate e Serbisë dhe Beogradi ka llogaritur në mbështetjen e Moskës për të bllokuar Prishtinën që të anëtarësohet në organizata dhe institucione ndërkombëtare. Përderisa Serbia ende vazhdon të refuzojë që të vendosë sanksione ndaj Rusisë për shkak të pushtimit të paprovokuar të Ukrainës, Kosova e ka sanksionuar Moskën.
