Zyra për Mbrojtje dhe Ndihmë të Viktimave (ZMNV) ka bërë të ditur se gjatë periudhës 31 korrik – 7 gusht 2026, mbrojtësit e viktimave në nivel vendi kanë trajtuar gjithsej 74 raste të reja.
Sipas të dhënave të publikuara nga ZMNV, pjesa dërrmuese e rasteve të trajtuara lidhen me dhunën në familje, gjithsej 70 raste. Ndërkaq, gjatë kësaj periudhe është trajtuar edhe një rast dhunimi, një rast bashkëjetese nën moshën 16-vjeçare, një rast shantazhi dhe një rast i shkeljes së urdhrit të mbrojtjes.
Gjatë javës, ZMNV ka paraqitur 8 kërkesa për urdhër mbrojtjeje në gjykatë, 19 kërkesa për urdhër mbrojtjeje emergjente dhe 2 kërkesa për ndryshimin e urdhrit të mbrojtjes.
Po ashtu, janë miratuar 18 aktvendime, është tërhequr një aktvendim dhe është refuzuar një tjetër. Mbrojtësit e viktimave kanë marrë pjesë në 32 seanca gjyqësore dhe 9 seanca në prokurori, ndërsa kanë ofruar 67 këshilla juridike për viktimat.
Në aspektin gjyqësor, janë shqiptuar 4 aktgjykime dënuese dhe 2 aktgjykime refuzuese.
ZMNV ka realizuar gjithashtu 4 referime të rasteve në Agjencinë për Ndihmë Juridike Falas (ANJF), 5 referime në Qendrën për Punë Sociale (QPS), një përfaqësim në strehimore dhe një referim të rastit në Policinë e Kosovës.
