Një turist amerikan ka vdekur pasi u godit nga rrufeja ndërsa po bënte ecje në malin Etna në Siçili.
Sipas mediave italiane, 30-vjeçari, të dhënat e të cilit nuk janë bërë publike nga autoritetet, ishte në vullkanin aktiv të dielën kur shpërtheu një stuhi.
Burri i pafat u gjet në një zonë të kufizuar , e cila ndonjëherë përdoret për t’iu afruar majës. Ai u dërgua me helikopter në spitalin Cannizzaro në Catania, ku u shpall i vdekur.
Një seri shpërthimesh të kohëve të fundit në vullkanin më aktiv të Evropës ka shkaktuar probleme për trafikun ajror lokal, por ka shërbyer edhe si magnet për shumë turistë.
Për shkak të rritjes së aktivitetit vullkanik, autoritetet kanë kufizuar qasjen në gjithnjë e më shumë zona të Etnës.
Nga ana e tij, shërbimi i Mbrojtjes Civile të Italisë paralajmëron se kombinimi i aktivitetit vullkanik me ndryshimet e papritura të motit në pikat më të larta të malit mund të krijojë kushte jashtëzakonisht të rrezikshme.
Me informacion nga BBC
