Forcat Mbrojtëse të Izraelit njoftuan vrasjen e Hussein Makled, kreut të selisë së inteligjencës së Hezbollahut, një grup i shpallur terrorist nga Shtetet e Bashkuara dhe Bashkimi Evropian.
Ai u vra në një sulm në Bejrut mbrëmë, sipas ushtrisë izraelite.
Izraeli nisi një seri sulmesh ndaj Libanit në përgjigje të granatimeve në zonat veriore të vendit. Njoftimi për shtyp i IDF-së deklaroi se sulmi kishte në shënjestër qendrat e komandës në të gjithë Libanin dhe një strukturë magazinimi armësh në Tire (Sur). “IDF do të kundërshtojë vendimet e Hezbollahut për t’u bashkuar me fushatën dhe për të vepruar në emër të regjimit iranian dhe do të parandalojë dëmin ndaj Shtetit të Izraelit, dhe në veçanti ndaj popullsisë civile të Izraelit verior”, thuhej në deklaratën e IDF-së.
Për më tepër, më herët më 2 mars, televizioni Al Hadath, duke cituar burime, raportoi se Mohammed Raad, kreu i fraksionit parlamentar “Besnikëri ndaj Rezistencës”, u vra në një sulm izraelit në periferitë jugore të Bejrutit. Sipas burimeve të këtij televizioni, të paktën 10 persona u vranë së bashku me Raadin.
Qeveria libaneze, nga ana e saj, njoftoi ndalimin e “çdo aktiviteti sigurie ose ushtarak” nga grupi. “Ne ndalojmë aktivitetin ushtarak të Hezbollahut, e kufizojmë rolin e tij në sferën politike dhe kërkojmë që institucionet ushtarake ta zbatojnë këtë”, citon Al Jazeera të ketë thënë kryeministrin Nawaf Salam. Ai gjithashtu kërkoi që grupi të dorëzojë armët e tij.
Salam riafirmoi angazhimin e qeverisë ndaj armëpushimit të arritur me Izraelin në vitin 2024 dhe rifillimit të negociatave.
Associated Press, duke cituar Ministrinë e Shëndetësisë libaneze, raportoi se më shumë se 30 persona u vranë dhe rreth 150 të tjerë u plagosën si pasojë e sulmeve izraelite në Liban.
