Një grua 49-vjeçare me probleme psikiatrike, sipas shtypit, sulmoi dhe plagosi për vdekje një grua tjetër me thikë dhe një burrë, përpara se të qëllohej për vdekje nga policia dje, të hënën, në zonën shumë turistike të Times Square në New York.
Autorja, e cila i goditi me thikë dy personat “pa provokim”, sipas autoriteteve dhe mediave amerikane, ndërroi jetë nga plagët e marra, ashtu si edhe një nga viktimat e saj, njoftoi kryebashkiaku i metropolit amerikan, Zoran Mamdani.
“Me keqardhje të thellë, ju njoftoj se një nga viktimat ka ndërruar jetë, si dhe autori i sulmit”, tha zyrtari i zgjedhur gjatë një konference për shtyp. Viktima e dytë “po trajtohet në gjendje të rëndë”, shtoi ai.
Kur u kontaktua nga AFP për koment, Departamenti i Policisë së Nju Jorkut konfirmoi se oficerët ishin të përfshirë në një incident me të shtëna dhe shtoi se do të mbante një konferencë për shtyp në vendngjarje më vonë. “Për momentin, hetimi është ende duke vazhduar”, tha një zëdhënës.
Një gazetar i AFP-së që shkoi në vendngjarje pasi ndodhi incidenti vuri re një prani të madhe të policisë dhe shërbimeve të emergjencës dhe një pellg gjaku në tokë.
Sipas NBC News dhe gazetës tabloide New York Post, gruaja u dërgua në spital dhe ishte në gjendje kritike.
Motivi i sulmit është ende i panjohur, por autoritetet nuk duket se besojnë se ishte një akt terrorist.
Një dëshmitar okular i tha PIX11 News se gruaja “vrapoi pranë meje drejt qoshes” së rrugëve dhe “kishte dy thika në duar”. Ai tha gjithashtu se oficerët përdorën një armë Taser, një lloj arme jo-vdekjeprurëse që shkakton goditje elektrike, për ta ndaluar, por ajo u zhvendos drejt tyre dhe u qëllua “dy herë”.
Sipas stacionit televiziv, i cili citoi burime policore, gruaja kishte një histori problemesh të shëndetit mendor dhe ishte e njohur për autoritetet policore që nga viti 2018.
Burimi: APE-MPA
