Lëvizja Vetëvendosje, Qendra në Prishtinë, ka zhvilluar të martën një aksion simbolik para objektit të Komunës së Prishtinës, në shenjë proteste për gjendjen me mbeturinat në kryeqytet.
Aktivistë të LVV-së vendosën thasë me mbeturina para hyrjes së komunës, duke e bllokuar përkohësisht atë.
Egzon Azemi, nga LVV-ja në Komunën e Prishtinës, tha se me këtë aksion synuan të tërheqin vëmendjen për problemin e mbeturinave në kryeqytet.
Sipas tij, gjendja me mbeturinat është përkeqësuar dhe shumë lagje të Prishtinës, siç u shpreh ai, janë shndërruar në “deponi mbeturinash”.
Azemi kritikoi kryetarin e Prishtinës, Përparim Rama, duke thënë se Komuna duhet t’i kushtojë më shumë vëmendje problemeve me të cilat përballen qytetarët.
Ai kritikoi edhe mënyrën e funksionimit të Ndërmarrjes “Pastrimi”, duke pretenduar se numri i punëtorëve administrativë është i lartë krahasuar me ata që merren drejtpërdrejt me pastrimin e qytetit.
“Këto skandale të njëpasnjëshme, skandalet e pronave, skandalet në Ndërmarrjen Publike Banesore, kjo gjendje alarmante me mbeturina, normalisht se duhet të ishin temat me të cilat merret kryetari i kryeqytetit”, tha Azemi.
Aksioni nuk zgjati shumë, teksa më pas punëtorët e kompanisë “Pastrimi” reaguan dhe i larguan thasët nga hyrja e komunës.
