Bjellorusia, aleati më i ngushtë ushtarak i Rusisë, këtë javë kreu ushtrime në shkallë të gjerë pranë Korridorit Suwalki, një kalim i ngushtë që lidh shtetet baltike me pjesën tjetër të NATO-s, një nga pikat më të cenueshme të Aleancës. Kjo e shqetësoi Evropën.Presidenti francez Emmanuel Macron ftoi udhëheqësit politikë të vendit në një takim të klasifikuar informativ të inteligjencës, dhe më pas njoftoi masa të reja për të mbrojtur infrastrukturën kritike nga sulmet hibride ruse në intensifikim.
Kryeministri polak, Donald Tusk, shkoi një hap më tej, duke paralajmëruar se Rusia mund të nisë sulme me dronë ose raketa ndaj vendeve të NATO-s dhe t’i mbulojë ato si incidente të rastësishme.
Britania e Madhe u bëri thirrje qytetarëve të saj të fillojnë përgatitjet për mundësinë e luftës dhe të grumbullojnë ushqime të konservuara dhe ujë të pijshëm. Shefi i mbrojtjes tha se Britania po përballet me periudhën “më të rrezikshme” në dekada.
Gjermania po përgatit spitalet e saj për një sulm të mundshëm rus. Kancelari i saj Friedrich Merz paralajmëroi për “momente vendimtare në mbrojtjen e lirisë dhe paqes në Evropë”.
Edhe Zvicra, e njohur për neutralitetin e saj, ka miratuar një strategji të re të sigurisë kombëtare që bën thirrje për rezistencë më të madhe dhe aftësi për t’u mbrojtur nga sulmet e armatosura.
Ndërkohë, Presidenti i SHBA-së, Donald Trump, njoftoi papritur përparimin drejt krijimit të një baze të përhershme ushtarake amerikane në Poloni. Dy javë më parë, ai dërgoi drejtorin e CIA-s në një mision sekret për të paralajmëruar Moskën kundër pushtimit të territorit të NATO-s.
Vendet në të dyja anët e Atlantikut duken të alarmuara se Presidenti rus Vladimir Putin së shpejti mund ta zgjerojë luftën e tij përtej Ukrainës.
Zgjerimi rus i fushës së betejës
Rusia po përdor gjithnjë e më shumë operacione nën pragun e luftës së hapur, siç janë zjarrvënia e qëllimshme, akuzat për planifikim vrasjesh, sulmet me dronë, sulmet kibernetike dhe sabotimi i infrastrukturës në SHBA dhe Evropë. Analistët bien dakord se qëllimi është të testohet vendosmëria e NATO-s duke ruajtur mundësinë e mohimit.
Korridori Suwali ndodhet në kufirin e Polonisë dhe Lituanisë dhe lidh Bjellorusinë me Oblastin rus të Kaliningradit.
Ky kalim përfaqëson një pikë kyçe strategjike, duke qenë se është e vetmja lidhje tokësore midis shteteve baltike të NATO-s dhe pjesës tjetër të Aleancës. Një hyrje e kufizuar ruse në këtë zonë do të synonte kryesisht minimin e Nenit 5 dhe testimin e gatishmërisë së anëtarëve të NATO-s (veçanërisht të SHBA-së) për të hyrë në një konflikt për një territor të vogël.
Megjithatë, roli i SHBA-së është i pasigurt. Shpërndarja e tepërt e burimeve amerikane në shumë pika të nxehta globale dhe pasiguria politike në Uashington po dëmtojnë besueshmërinë e ombrellës mbrojtëse të Amerikës, gjë që dëmton më tej aftësinë parandaluese në sytë e Moskës.
Megjithatë, NATO po e ndryshon qasjen e saj duke mësuar nga Ukraina rreth rëndësisë së rezistencës civile (energjia, shëndetësia, komunikimet, stabiliteti social). Vetë përgatitja e sektorëve civilë dhe shtetërorë po bëhet një pjesë kyçe e parandalimit të Rusisë.
Kjo është arsyeja pse vendet evropiane po i japin fund neglizhencës së tyre dhjetëvjeçare të mbrojtjes dhe mbrojtjes civile. Të vetëdijshëm se parandalimi varet nga vlerësimet e Putinit, udhëheqësit evropianë po marrin me shpejtësi masa për të vërtetuar se agresioni rus nuk mund të ketë sukses.
