Kemi arritur një marrëveshje historike për kthimin e eshtrave të carit Samuill, njoftoi kryeministri Rumen Radev në fillim të mbledhjes së qeverisë. Ai shtoi se kjo është rezultat i negociatave intensive mes Bullgarisë dhe Greqisë.
“Më 3 tetor, të shtunën, në orën 12:30, ftoj të gjithë bullgarët në sheshin ‘Batenberg’ para Pallatit Mbretëror në Sofje që së bashku të presim eshtrat dhe të përulemi para sundimtarit të madh bullgar”, tha Rumen Radev, cituar nga BTA.
Një çështje e pazgjidhur prej dekadash, me rëndësi të veçantë historike dhe simbolike për marrëdhëniet greko-bullgare, duket se po shkon drejt zgjidhjes, shkruan media greke naftemporiki.gr. Pritet që deri në fund të javës qeveria në Athinë t’ia dorëzojë Bullgarisë eshtrat e carit Samuill. Ato janë zbuluar në vitin 1969 nga arkeologu grek Nikolaos Moutsopoulos në bazilikën “Shën Akili” në Liqenin e Prespës së Vogël.
Çështja e kthimit të eshtrave mbretërore është ngritur në vitin 2022 nga kryeministri bullgar Kirill Petkov dhe zëvendëskryeministri Asen Vasilev, gjatë negociatave për lidhjet praktike energjetike dhe infrastrukturore ndërmjet dy vendeve fqinje.
Sipas publikimit, të cituar nga mediat elektronike bullgare, lidhur me kthimin e eshtrave është shprehur edhe Kisha Ortodokse Greke.
Si komandant ushtarak dhe më pas si sundimtar, cari Samuill për 43 vjet mbrojti tokat bullgare nga pushtimi i Perandorisë Bizantine, i cili zgjati gjysmë shekulli. Ai vdiq më 6 tetor 1014 në Prespë. Sipas burimeve historike, sundimtari bullgar pësoi një goditje fatale në zemër kur pa ushtrinë e tij të verbuar, e cila ishte zënë rob më parë nga perandori bizantin Vasili II, i njohur si “Vrasësi i Bullgarëve”.
