Në një operacion të madh policor ndërkombëtar të kryer në 19 vende evropiane, u shkatërrua një grup i organizuar kriminal i dyshuar për shitjen e rreth një milion telefonave të rremë Samsung me cilësi të dobët dhe shmangien e dhjetëra miliona eurove në taksa.Aksioni u krye nga autoritetet doganore, policore dhe tatimore në bashkëpunim me Zyrën e Prokurorit Publik Evropian (EPPO), raportojnë mediat gjermane WDR, NDR dhe Süddeutsche Zeitung (SZ).
Hetuesit kontrolluan 160 prona në të gjithë Evropën dhe shtatë persona u arrestuan gjatë fundjavës. Fokusi i operacionit ishte në provincën gjermane të North Rhine-Westphalia.
Në Dusseldorf, forcat speciale doganore arrestuan shtetasin ukrainas 43-vjeçar Oleksiy S., i cili akuzohet për themelimin e një organizate kriminale së bashku me Eugene R., një shtetas moldav. Të dy të dyshuarit kanë dënime të mëparshme për mashtrim.
Sipas dokumenteve konfidenciale nga hetimi, të dyshuarit kanë zhvilluar një skemë komplekse që nga viti 2017. Ata blenë pjesë të përdorura dhe të vjetra të telefonave celularë në tregjet aziatike dhe arabe, të cilat më pas u pastruan plotësisht dhe u rimontuan në punishte në Dubai dhe Hong Kong.
Pajisjet u paketuan në kuti dhe u vulosën profesionalisht në mënyrë që të mos dalloheshin nga modelet origjinale të reja të Samsung. Më pas, ato u importuan në BE dhe u shitën nëpërmjet platformave online si Amazon – kryesisht te blerës të pavetëdijshëm në Gjermani.
Në këtë mënyrë, grupi arriti të ardhura prej të paktën 300 milionë eurosh, duke shitur rreth një milion pajisje të tilla.Përveç mashtrimit të klientëve, grupi akuzohet për shmangie të të paktën 24 milionë eurove taksa vetëm në Gjermani.
Telefonat hynin në BE nëpërmjet Holandës, nga ku dërgoheshin vetëm në letër në vendet e Evropës Lindore për të shmangur pagesën e TVSH-së së importit. Në realitet, telefonat celularë transportoheshin direkt në depot gjermane, si ajo në Krefeld. Për të mbuluar gjurmët, mallrat transferoheshin në mënyrë fiktive nëpërmjet një numri kompanish të rreme.
Disa klientë u ankuan në internet për rinisje dhe defekte të shpeshta, dhe një kontroll identifikimi me Samsung zbuloi se pajisjet nuk ishin aspak të reja. Pavarësisht kësaj, një nga kompanitë kryesore në rrjet, “FBA Services BV”, kishte vlerësime të larta në Amazon.
Të dyshuarit i investuan paratë e mbledhura në luks. Gjatë masave të përgjimit, hetuesit vunë re se Oleksiy S. po negocionte me një agjent pasurish të paluajtshme për të blerë një ndërtesë me një buxhet prej tre milionë eurosh.
Partneri i tij Eugen R., i cili qëndron shpesh në Dubai, drejtonte një Rolls-Royce Cullinan Black Badge luksoz, çmimi fillestar i të cilit është më shumë se 400,000 euro.
I gjithë mashtrimi filloi të zbulohej vitin e kaluar falë një informacioni anonim të dërguar një kompanie logjistike dhe Zyrës së Hetimit Doganor në Essen. Pas kësaj, u nis një hetim i gjerë ndërkombëtar, i cili, për shkak të natyrës së tij ndërkufitare, drejtohet nga EPPO.
