Zëdhënësi i Kremlinit, Dmitry Peskov, deklaroi se Presidenti i SHBA-së, Donald Trump, i kishte sugjeruar Ukrainës të zgjidhte një president të ri, sepse Volodymyr Zelensky nuk ishte i gatshëm të merrte vendimet e nevojshme për t’i dhënë fund luftës së Rusisë kundër Ukrainës.
“Trump tha se, sipas mendimit të tij, është koha për një president të ri”, tha Peskov.
“Pse? Sepse presidenti i Ukrainës duhet të marrë vendime shumë të përgjegjshme dhe shumë të vështira për të ndaluar këtë luftë.”Peskov akuzoi Zelenskyn se nuk arriti të demonstrojë vullnet politik për të ndërmarrë ato hapa.
“Ose Zelensky e merr përsipër këtë përgjegjësi dhe e demonstron atë vullnet politik, ose nuk e bën”, tha ai. “Deri më tani, nuk e ka bërë.”
Presidenti Volodymyr Zelensky të dielën kundërshtoi thirrjen e homologut të tij amerikan Donald Trump për zëvendësimin e tij, por tha se vendi i tij mund të mbajë zgjedhje nëse Rusia pranon një armëpushim 60-ditor.Tensionet janë përshkallëzuar sërish midis dy udhëheqësve pasi Trump njoftoi të premten se do të heqë dorë nga sanksionet për një sasi të madhe të naftës ruse për të ndihmuar në uljen e çmimeve të karburantit përpara zgjedhjeve të mesmandatit të nëntorit në SHBA.
Të shtunën, Trump sulmoi ashpër Zelenskyn për sulmet e Ukrainës ndaj rafinerive ruse të naftës, duke argumentuar se ato kanë kontribuar në rritjen e çmimeve të naftës dhe bëri thirrje që ai të zëvendësohet nga një udhëheqës që do ta zgjidhë luftën.
“ Para së gjithash, me gjithë respektin për Presidentin Trump, i takon shoqërisë sonë , popullit tonë të zgjedhë njërin apo tjetrin udhëheqës”, tha Zelensky për ABC News në një intervistë televizive të dielën.Zelensky tha se i tha ekipit të Trump se nëse ata vërtet donin që Ukraina të mbante zgjedhje – të parat që nga fillimi i pushtimit rus në vitin 2022 – “ju lutem i thoni Putinit të na japë dy muaj, 60 ditë armëpushim të plotë, 60 ditë, dhe ne do të organizojmë zgjedhje”.
