Gjatë vizitës zyrtare në Paris të Francës, kryetari i Lidhjes Demokratike të Kosovës, Lumir Abdixhiku, zhvilloi takime në Pallatin Presidencial Élysée, në Ministri të Punëve të Jashtme, dhe në Senatin francez.
Kryetari Abdixhiku u prit në Pallatin Presidencial Élysée, nga Këshilltarja e Presidentit Macron, znj. Isabelle Dumont; në Ministri të Punëve të Jashtme nga zëvendësdrejtori për Evropën Kontinentale, z. Sylvain Guiaugue; derisa në senat nga Senatorja Sénatrice Laure Darcos, kryetare e Grupit të Miqësisë Francë – Kosovë.
Në këto takime, kryetari i LDK-së, Abdixhiku shprehu falenderimet për mbështetjen e shtetit francez në të gjitha periudhat shtetndërtuese të Republikës së Kosovës. Kryetari Abdixhiku në këto takime ritheksoi qëndrimet e LDK-së mbi procesin e dialogut, si një proces të cilin vendi ynë duhet ta trajtojë me prioritet si mjet drejt arritjes së një marrëveshje përfundimtare dhe ligjërisht të obligueshme, me njohjen në qendër të saj. Implementimi i marrëveshjeve paraprake, konform rendit kushtetues të Republikës së Kosovës nuk kanë alternativë. Kryetari Abdixhiku ka shtruar po ashtu, domosdoshmërinë e hapjes së rrugës së re, drejt integrimit euroatlantik, me theks të veçantë, anëtarësimin sa më të shpejtë të Kosovës në NATO; dhe mbështetjen që Franca mund ta jep në këtë drejtim.
Në të gjitha takimet, u fol edhe për interesimin e shtuar francez për investime ekonomike në Kosovë dhe gjithë Ballkanin Perëndimor. /Kosovatimes/
