Mijëra të rinj shqiptarë u mblodhën sot jashtë Ministrisë së Arsimit, në qendër të Tiranës, në ditën e pestë të një lëvizjeje në rritje – të udhëhequr nga studentët – që kërkon dorëheqjen e kryeministrit Edi Rama .
Protesta u shndërrua në dhunë kur një grup të rinjsh të maskuar hodhën gurë drejt forcave të policisë, të cilat u përgjigjën duke hedhur granata zhurmuese, gaz lotsjellës dhe duke përdorur topa uji.
Me atmosferën mbytëse nga gazi lotsjellës, përleshje me policinë u zhvilluan në shumë rrugë të Tiranës, me protestuesit që hodhën kokteje Molotov, thyen xhamat e bizneseve me shufra hekuri dhe më pas i plaçkitën ato.
Tensionet arritën kulmin pak më parë gjatë marshimit të protestuesve drejt zyrës së kryeministrit .
Nga çatia e Ministrisë së Brendshme, forcat e policisë qëlluan gaz lotsjellës për t’i shpërndarë, por nuk patën sukses, duke rezultuar në një situatë që i ngjan luftës edhe sot e kësaj dite.
Një top uji i blinduar i policisë u përfshi nga flakët në çati, ndërsa një makinë jashtë zyrës së kryeministrit u përfshi gjithashtu nga flakët.
Sipas të dhënave zyrtare të spitalit, nga incidentet e katër ditëve të fundit janë 207 të plagosur, 132 janë oficerë policie, 58 janë protestues dhe 17 janë kalimtarë.
Protestat kundër korrupsionit dhe humbjes së vendeve të punës janë përhapur në të gjithë Shqipërinë. Në Tiranë, protestuesit kanë thyer dritare, kanë vënë flakën ndërtesave qeveritare dhe janë përleshur me policinë gjatë javës së kaluar.
Sipas shifrave të policisë, deri më tani janë ndaluar 500 protestues, nga të cilët 330 janë liruar. Rreth 120 oficerë policie dhe 45 protestues u regjistruan si të plagosur, megjithëse është e mundur që shumë lëndime të protestuesve të mos jenë regjistruar.
Trazirat përbëjnë kërcënimin më të madh për Ramën, i cili ka qeverisur që nga viti 2013 dhe fitoi një mandat të katërt në zgjedhjet e vitit të kaluar.
Protestat vijnë pas muajsh demonstratash paqësore , të nxitura nga planet për të ndërtuar një vendpushim luksoz në vijën bregdetare të paprekur jugore të Shqipërisë, një projekt i mbështetur nga investitorë, përfshirë Jared Kushner, dhëndrin e Presidentit të SHBA-së Donald Trump.
Qeveria e Ramës eshte akuzuar vazhdimisht per skandale dhe korrupsion dhe, sipas analistëve, Shqipëria është një qendër për organizatat kriminale që kërkojnë të pastrojnë të ardhurat nga trafiku i drogës dhe armëve, gjë që ndërlikon përpjekjet e vendit për t’u bashkuar me BE-në.
Rama, i cili mohon çdo shkelje dhe i tha Reuters këtë javë se nuk do të japë dorëheqjen, theksoi të hënën se qeveria e tij i respekton studentët dhe do të mbrojë të drejtën e tyre për të protestuar.
“Përgjegjësia ime është edhe më e qartë në këto kohë të vështira, për të mbrojtur qytetarët tanë, për të garantuar drejtësinë dhe për ta udhëhequr Shqipërinë përpara, së bashku me këtë shumicë qeverisëse, e cila ka një mandat shumë të qartë: ta shohë Shqipërinë në Bashkimin Evropian deri në vitin 2030”, shkroi ai në Facebook.
