Forca të shtuara policore janë angazhuar në një operacion në një objekt afarist në Prishtinë, ku veprojnë disa qendra të thirrjeve telefonike (Call Center).
Aksioni po zhvillohet në bashkëpunim me autoritetet ndërkombëtare, ka konfirmuar zëdhënësja e Prokurorisë Speciale, Arbnora Luta.
Duke folur lidhur me operacionin, Luta ka bërë të ditur se ndërhyrja është ende në zhvillim, pa zbuluar detaje rreth hetimeve.
“Mund të konfirmojmë që ka aksion, në bashkëpunim me autoritetet ndërkombëtare”, ka deklaruar Luta.
Ndërkohë, në objektin ku po zhvillohen veprimet hetimore janë parë një numër i konsiderueshëm i zyrtarëve policorë.
Deri më tash, Prokuroria Speciale nuk ka dhënë informacione shtesë lidhur me dyshimet që kanë çuar në këtë operacion, personat e përfshirë apo rezultatet e deritanishme të aksionit.
