Një alarm për karantinë masive u dha në Aeroportin e Frankfurtit këtë mëngjes, pasi pasagjerët në dy aeroplanë të linjës ajrore Condor që fluturonin nga Republika Dominikane u sëmurën gjatë fluturimit.
Siç konfirmoi një zëdhënëse e Condor për shërbimin publik hessenschau, disa pasagjerë u ankuan për të përziera dhe dobësi, dhe disa madje edhe të vjella. Në të dy aeroplanët, të cilët u nisën nga La Romana, kishte gjithsej rreth 620 persona.
Sipas Frankfurter Rundschau dhe Bild, alarmi “MANV 25”, që në Gjermani do të thotë pranim masiv i deri në 25 personave të lënduar ose të sëmurë, u aktivizua rreth orës 9:19 të mëngjesit.
Shërbimet e emergjencës ishin në gatishmëri ndërsa aeroplanët ishin ende në ajër, dhe ambulanca dhe zjarrfikës të shumtë i pritën ata në pistë.
Mjekët ekzaminuan pasagjerët në aeroplan menjëherë pas uljes. Shumica u liruan pas ekzaminimit dhe vazhduan udhëtimin e tyre. Sipas hessenschau, dy pasagjerë u dërguan në spital – njëri me kërkesën e tij, tjetri për shkak të problemeve me qarkullimin e gjakut.
Condor tha në një deklaratë se pas raportimit të shqetësimit gjatë fluturimit, si një procedurë standarde dhe si masë paraprake, njoftoi aeroportin dhe autoritetet përkatëse. Në raste të tilla, përfshihet edhe Instituti i Shëndetit Publik të Frankfurtit.
Saktësisht se sa pasagjerë kishin simptoma nuk është njoftuar zyrtarisht.
Mediat gjermane po raportojnë rreth 40 raste. Disa gazeta po raportojnë se dyshohet për norovirus, një shkaktar i infeksioneve të rënda të zorrëve, por kjo nuk është konfirmuar dhe shkaku, sipas hessenschau, ishte ende i panjohur të dielën pasdite.
Condor pati një situatë të ngjashme në maj 2024, kur disa pasagjerë në një fluturim nga Mauritiusi për në Frankfurt vjellën dhe u ankuan për të përziera të forta, dhe u pritën nga shërbimet e emergjencës pas uljes.

