Më 13 prill , një shtetase ruse u arrestua në qytetin suedez të Goteborgut nën dyshimin për spiunazh industrial . Emri i saj nuk tregohet. Sipas policisë, gruaja ruse u ndalua në rafinerinë Preem.
Tani ajo është në arrest. Shërbimi për shtyp i Preemit konfirmoi ndalimin e saj dhe sqaroi se e arrestuara punonte për një nga nënkontraktorët e kompanisë. Pas ndalimit të saj, shërbimet speciale suedeze morën në pyetje dëshmitarët dhe e kontrolluan atë. Detajet e rastit nuk bëhen të ditura në interes të hetimeve.
Në muajt e fundit, shtetas të Rusisë dhe vendeve të tjera janë arrestuar disa herë në Suedi me dyshimin se kanë spiunuar për Rusinë. Më 19 janar, gjykata shpalli fajtorë vëllezërit Peyman dhe Payama Kia për spiunazh . Peyman u dënua me burgim të përjetshëm, ndërsa vëllai i tij Payama u dënua me nëntë vjet e dhjetë muaj burg.
Në fund të vitit 2022, një çift rus u arrestua në Suedi, Sergej Skvortsov dhe Elena Kulkova kanë jetuar në vend për 20 vjet. Ata dyshohet se kanë bashkëpunuar me shërbimet speciale ruse./Kosovatimes/
