Tetë fëmijë, të moshës 1 deri në 14 vjeç, u vranë në një të shtënë me armë në qytetin e Shreveport, të cilën policia e përshkruan si një incident “mosmarrëveshjeje familjare”.
Sipas autoriteteve, incidenti ndodhi afërsisht në orën 05:00 sipas orës lokale, kur një person i armatosur hapi zjarr ndaj 10 personave. Policia e ndoqi dhe e qëlloi për vdekje ndërsa ai përpiqej të ikte.
“Kemi familje që po vuajnë, kemi oficerë policie dhe ekzaminues mjekësorë që po vuajnë”, tha kryebashkiaku i qytetit. “Kjo ndikon në të gjithë komunitetin, të gjithë mbajmë zi me këto familje.”
Policia nuk bëri të ditur identitetin e autorit të krimit apo të viktimave, por tha se disa nga fëmijët ishin të lidhur me autorin e krimit.
“Kjo është një tragjedi, ndoshta më e keqja që kemi përjetuar ndonjëherë në Shreveport”, shtoi kryebashkiaku.
Kronologjia e sulmit
Autoritetet thanë se të shtënat ndodhën në dy shtëpi në të njëjtin bllok dhe në një shtëpi të tretë në lagje. Oficerët mbërritën në njërën nga shtëpitë pak para orës 6 të mëngjesit dhe gjetën fëmijët. “Të gjithë të ndjerit janë të mitur”, tha ai.
Ai shtoi se incidenti konsiderohet “me natyrë familjare”, ndërsa një nga personat që u qëllua me armë zjarri iku në një banesë aty pranë.
Pas sulmit, autori i dyshuar hipi në një automjet dhe u përpoq të ikte, përpara se të gjendej dhe të ndiqej nga policia në një zonë tjetër, ku u vra.
Shefi i policisë së qytetit tha se ishte “e paimagjinueshme se si mund të ndodhte një ngjarje e tillë “, duke shtuar se hetimi po zhvillohej në bashkëpunim me Policinë Shtetërore të Luizianës dhe agjenci të tjera.
“Ne do të punojmë pa u lodhur, për aq kohë sa të jetë e nevojshme, për të dhënë përgjigje për atë që ndodhi”, theksoi ai.
Guvernatori i shtetit të Luizianës tha se ai dhe gruaja e tij janë “të shkatërruar nga kjo situatë e tmerrshme” dhe po luten për të gjithë të prekurit.
