Kryeministri i ardhshëm i Hungarisë, Peter Magyar, i kritikoi përsëri oligarkët e mbledhur rreth Viktor Orbanit dhe tha se ka informacion të besueshëm se ata po largohen nga vendi.Magyar, duke komentuar në rrjetin social X rreth situatës në Hungari, deklaroi se oligarkët po i zhvendosin paratë e tyre nga Hungaria në vende të tjera.
“Oligarkët e lidhur me Orbán po transferojnë dhjetëra miliardë forinta në Emiratet e Bashkuara Arabe, Shtetet e Bashkuara të Amerikës, Uruguai dhe vende të tjera të largëta. Jam në dijeni se Administrata Kombëtare Hungareze e Taksave dhe Doganave (NAV), bazuar në raportet bankare, ka pezulluar disa transferta me vlerë të madhe të lidhura me rrethin e Antal Rohan për shkak të dyshimeve për pastrim parash. I bëj thirrje menaxhmentit të NAV që të ngrijë menjëherë këto fonde të vjedhura”, tha Magyar.
Ai i bëri thirrje prokurorisë dhe policisë që të veprojnë.
“Edhe një herë, i bëj thirrje kryeprokurorit, kreut të policisë kombëtare dhe kreut të NAV-it që të ndalojnë kriminelët që i kanë shkaktuar popullit hungarez dëme prej mijëra miliarda forintash dhe të mos i lejojnë ata të arratisen, para formimit të qeverisë TISZA, në vende nga të cilat ekstradimi aktualisht nuk është i mundur”, tha ai.
Ai theksoi gjithashtu se hungarezët e pasur po shesin gjithashtu aksionet e tyre në kompanitë mediatike.
“Jam gjithashtu në dijeni se oligarkët e lidhur me Orbán kanë filluar të shesin TV2 dhe shtëpi të tjera mediatike me çmime më të ulëta se ato të tregut, përfshirë kompaninë kryesore të propagandës së lidhur me Rohán, Lounge Event Kft. U bëj thirrje investitorëve të përgjegjshëm vendas dhe ndërkombëtarë që të përmbahen nga blerja e aseteve të lidhura me mafian; përndryshe, ata mund të gjenden përballë Zyrës Kombëtare të Rimëkëmbjes dhe Mbrojtjes së Aseteve”, tha Magyar.
Në fund, Magyari e thirri edhe mikun e hershëm të Orbanit dhe njeriun më të pasur në Hungari, Lorinc Meszaros.
“Gjithashtu jam informuar se disa familje oligarkike janë larguar tashmë nga vendi dhe se familja Meszaros pritet të udhëtojë për në Dubai në ditët në vijim. Sipas raportimeve, disa familje oligarkike me ndikim tashmë i kanë tërhequr fëmijët e tyre nga shkolla dhe po organizojnë personel të besueshëm sigurie për largimin e tyre”, përfundoi Magyar.
