Autoritetet e SHBA-së dhe NATO-s pranojnë se Ukraina mund të fillojë negociatat me Rusinë nga një pozicion i forcës pasi ushtria ukrainase të çlirojë Kherson, të pushtuar nga trupat ruse, shkruan gazeta italiane La Repubblica.
Sipas botimit, Shtetet e Bashkuara i kanë përcjellë një mesazh të tillë Bashkimit Evropian dhe e kanë hedhur këtë ide tek autoritetet ukrainase. Gazeta vë në dukje se Uashingtoni e parashtroi një propozim të tillë për herë të parë.
La Repubblica thekson se analiza e fundit që qarkullon në selinë e NATO-s në Bruksel thotë se disfata ruse në Kherson është e rëndësishme nga pikëpamja ushtarake, politike dhe diplomatike – dhe do të japë një mundësi për të filluar negociatat e para reale me Moskën.
Më herët në nëntor, gazeta amerikane The Washington Post raportoi se administrata presidenciale amerikane u kërkoi autoriteteve ukrainase të demonstrojnë publikisht se Kievi është gati për negociata me Moskën, në mënyrë që të mos shqetësojë qytetaret e vendeve te jashtme që mbështesin Ukrainën.
Në tetor, presidenti ukrainas Volodymyr Zelensky nënshkroi një dekret që deklaronte “pamundësinë e negociatave me presidentin rus Vladimir Putin”. Kjo ndodhi pasi Rusia njoftoi aneksimin e territoreve të Ukrainës. Para kësaj, Zelensky paralajmëroi se nëse territoret aneksoheshin, atëherë Ukraina do të refuzonte çdo negociatë me Rusinë.
Përfaqësuesit e Rusisë kanë thënë vazhdimisht se janë të gatshëm të rifillojnë negociatat me Ukrainën, të ndërprera në pranverën e vitit 2022 ( pas vrasjeve të civilëve në Bucha). Sipas burimeve të Meduza , autoritetet ruse dëshirojnë të bien dakord me Ukrainën jo për një traktat paqeje të plotë, por për një armëpushim të përkohshëm, në mënyrë që të përdorin qetësinë për t’u përgatitur për një ofensivë të re në shkurt-mars 2023.
