Dy djem francezë të moshës tre dhe pesë vjeç u gjetën vetëm dhe duke qarë buzë rrugës në Portugalinë jugore. Pasi u gjetën nga një shofer pranë qytetit Alcácer do Sal të martën, një burrë dhe një grua, të cilët mediat lokale raportuan se ishin nëna dhe njerku i dy djemve, u arrestuan, shkruan BBC .
Babai i djemve i raportoi ata të zhdukur nga shtëpia e tyre në Colmar, në Francën lindore, më 11 maj, duke bërë që Franca të lëshonte një apel për ndihmë në të gjithë Evropën. Policia si në Portugali ashtu edhe në Francë nisi hetimet. Djemtë u gjetën nga shoferi Artur Quintas dhe gruaja e tij Eugenia , të cilët thanë se mbanin çanta shpine me ushqim dhe ujë, por jo dokumente identifikimi. Ai i ushqente ata përpara se t’i raportonte djemtë në polici.
Mediat lokale raportuan se çifti u arrestua pasi makina e tyre u pa jashtë një kafeneje në qytetin e Fatimës, rreth 180 km në veri të Alcácer do Sal. Një grua 41-vjeçare dhe një burrë 55-vjeçar, të cilët nuk janë identifikuar zyrtarisht, u arrestuan, njoftoi Garda Republikane Kombëtare e Portugalisë. Ata thanë gjithashtu se çifti po hetohej për krimet e dhunës në familje, rrezikimit dhe braktisjes.
Por pamjet rrëqethëse të kamerave të sigurisë kanë zbuluar se si një çift francez i braktisi qëllimisht fëmijët e tyre të vegjël në një pyll në Portugali. Vëllezërit i thanë një shoferi që i gjeti se prindërit e tyre i kishin lënë në rrugën N235 vetëm me një batanije, dy fruta dhe dy shishe me ujë. Pasi djemtë u dërguan në spital dhe në polici, është nisur një hetim për të përcaktuar se si arritën në Portugali.
Pamjet e reja, të siguruara nga mediat lokale dhe të raportuara nga CNN dhe
Daily Mail , tregojnë djemtë duke luajtur pafajësisht në makinën e prindërve të tyre në një pikë karburanti në Miranda do Douro, pranë kufirit me Spanjën. Makina gri është parkuar në pikën e karburantit, dhe njerku me nënë zbresin nga automjeti dhe i afrohen punëtorit.
Në sediljen e pasme, njëri nga djemtë u pa duke u ngjitur rreth sediljeve të përparme, ndërsa tjetri ishte i anuar drejt pjesës së përparme të makinës. Transmetuesi portugez TVI raportoi se pamjet filmike u bënë ditën që familja mbërriti në Portugali, më 11 maj në orën 6:16 pasdite.Raportet e reja të mediave lokale thonë se zhdukja e fëmijëve është raportuar në polici edhe nga nëna franceze, pra gjyshja e djalit, duke u thënë atyre se nëna e tyre i kishte rrëmbyer. Raporti i toksikologjisë zbuloi se prindërit nuk i kishin droguar djemtë.
Edhe më e tmerrshme ishte se çifti ua lidhi sytë dhe i çoi në pyll përpara se t’u thoshte se mund t’ua hiqnin vetëm fashat kur gjetën një thikë që çifti e kishte varrosur në tokë. Djemtë gërmuan në dhe për disa minuta përpara se djali më i madh t’ua hiqte fashat. Ata besonin se po luanin një lojë me prindërit e tyre. Ata endeshin nëpër zonë për orë të tëra.
Quintas u tha mediave lokale: “Më i madhi më tha se ai dhe vëllai i tij humbën në pyll dhe se nëna e tyre u largua pa i marrë me vete. E kuptova menjëherë se ishin braktisur. Kur pashë se si ishin paketuar çantat e shpinës, e dija se ishin braktisur.”
Djemtë u vendosën më vonë në kujdestari dhe autoritetet franceze tani janë gati të nisin procedurën për t’i kthyer djemtë në vendin e tyre. Policia franceze është tashmë në dijeni të njerkut, i cili besohet se vuan nga një çrregullim mendor.
