Policia zvicerane po heton një vjedhje me thyerje në shtëpinë e kampionit katër herë të botës në Formula 1, Alain Prost, ku thuhet se ai u plagos. Incidenti ndodhi të martën në mëngjes në Nyon dhe grabitësit ikën me plaçkën pasi detyruan një anëtar të familjes të hapte kasafortën, raporton Sky News.
Sipas një deklarate nga policia lokale, 71-vjeçari pësoi një dëmtim në kokë pasi “disa individë të maskuar hynë me forcë në shtëpi” rreth orës 8:30 të mëngjesit. Tabloidi zviceran Blick raportoi se Prost ishte personi i plagosur dhe se djali i tij u detyrua të hapte kasafortën.
Një hetim i plotë është nisur.
Zyra e prokurorit të shtetit konfirmoi detajet e sulmit. “Autorët hynë në banesë ndërsa banorët ishin të pranishëm, i kërcënuan ata dhe detyruan një anëtar të familjes të hapte kasafortën përpara se të ikte me sendet e vjedhura”, thuhet në deklaratë. Vlera e sendeve të vjedhura “po vlerësohet aktualisht”.
Policia “filloi menjëherë një operacion kërkimi në shkallë të gjerë dhe njoftoi zyrën e prokurorit të shtetit, e cila hapi një hetim penal”. Policia shtoi se deri më tani nuk ishin bërë arrestime dhe se oficerët po përcaktonin se çfarë ishte vjedhur. “Një hetim është duke u zhvilluar për të identifikuar dhe arrestuar autorët”, thanë ata.
Prost u largua nga shtëpia
Përveç policisë së kantonit të Vaud, në kërkim janë përfshirë edhe një numër shërbimesh të tjera, përfshirë policinë rajonale zvicerane dhe franceze, ekspertë mjeko-ligjorë, hetues doganorë dhe një ekip për të ofruar ndihmë psikologjike familjes. Blick shkruan se Prost ishte “dukshëm i tronditur nga kjo ndërhyrje brutale” dhe se ai u largua nga shtëpia e tij në brigjet e Liqenit të Gjenevës.
Francezi, i njohur me nofkën “Profesor”, fitoi katër kampionate botërore në Formula 1 midis viteve 1985 dhe 1993, dhe mbahet mend gjithashtu për rivalitetin e tij legjendar me pilotin brazilian Ayrton Senna.
