Në Kuvendin e 10-të Zgjedhor të Aleancës për Ardhmërinë e Kosovës, ku pritet të formalizohet zgjedhja e Ardian Gjini në krye të partisë, kryetari aktual Ramush Haradinaj ka mbajtur një fjalim para delegatëve, duke komentuar edhe rrugëtimin e tij politik dhe duke konfirmuar vazhdimësinë e angazhimit të tij për Kosovën dhe Aleancën.
Në Kuvendin e 10-të Zgjedhor të Aleancës për Ardhmërinë e Kosovës (AAK), kryetari aktual i partisë, Ramush Haradinaj, konfirmoi se po ia lë drejtimin e partisë Ardian Gjini, duke shprehur besim të plotë në udhëheqjen e tij.
“Sot kryetar Ardian, unë dhe Aleanca besojmë tek ti. Besojmë që të jesh prijësi ynë, prijësi i Kosovës”, deklaroi Haradinaj para delegatëve.
Ai kujtoi rrugëtimin e tij nga lufta çlirimtare deri te angazhimi politik, duke theksuar se do të vazhdojë t’i shërbejë vendit edhe pas largimit nga drejtimi i partisë.
“Shërbimi për Kosovën nuk përfundon kurrë”, tha ai.
Nga ana tjetër, Gjini e vlerësoi lart figurën e Haradinajt, duke e quajtur atë “simbol të Kosovës, simbol të lirisë dhe i politikës së mençur që ka ndodhur në Kosovë për më shumë se 30 vjet”.
Duke marrë përgjegjësinë për drejtimin e AAK-së, Gjini u shpreh i emocionuar dhe falënderoi anëtarësinë për besimin. Ai shtoi se historia e Kosovës dhe e Haradinajt “do të shkruhet me shkronja të arta”.
Sekretari i partisë, Besnik Tahiri, u emocionua gjatë fjalimit të kryetarit Ramush Haradinaj, i cili shprehu gatishmërinë për t’i hapur rrugë një gjenerate të re në udhëheqjen e subjektit.
Duke folur para delegatëve, Tahiri tha se mesazhi i Haradinajt i preku thellë të pranishmit dhe njëkohësisht i bëri krenarë për rrugëtimin politik të Aleancës.
Ai vlerësoi lart rolin dhe kontributin e Haradinajt në proceset historike të Kosovës, duke e cilësuar atë si një figurë me ndikim të veçantë në lirinë dhe ndërtimin e shtetit.
Kuvendi i AAK-së pritet të formalizojë zgjedhjen e Gjinit në krye të partisë dhe ta vendosë atë në krye të listës për zgjedhjet e ardhshme.
