Presidenti francez Emmanuel Macron e paralajmëroi udhëheqësin bjellorus Alexander Lukashenko kundër përfshirjes më të thellë në luftën e Rusisë kundër Ukrainës gjatë telefonatës së tyre të parë të raportuar që nga viti 2022. Biseda erdhi pasi Bjellorusia priti stërvitje të përbashkëta bërthamore me Rusinë dhe mes shqetësimeve të Ukrainës për një ofensivë të re të mundshme nga territori bjellorus. Macron gjithashtu i kërkoi Minskut të përmirësojë lidhjet me Evropën.Paralajmërimi u bë gjatë telefonatës së parë të raportuar midis dy udhëheqësve që nga ditët e para të pushtimit rus në shkurt 2022, pjesërisht e nisur nga territori bjellorus.
Macron “theksoi rreziqet për Bjellorusinë që mund të lejojë veten të përfshihet në luftën e agresionit të Rusisë kundër Ukrainës”, tha burimi, i cili foli në kushte anonimiteti.
“Ai gjithashtu i kërkoi Aleksandër Lukashenkos të ndërmarrë hapat e nevojshëm për të përmirësuar marrëdhëniet midis Bjellorusisë dhe Evropës”, shtoi burimi.
Një njoftim i shkurtër në faqen e internetit të presidencës bjelloruse tha se “krerët e shteteve diskutuan çështjet rajonale dhe marrëdhëniet e Bjellorusisë me BE-në dhe me Francën në veçanti”.
Biseda u zhvillua “me iniciativën e palës franceze”, shtoi njoftimi.
Më herët në maj, Presidenti ukrainas Volodymyr Zelensky urdhëroi trupat të përforconin kufirin me Bjellorusinë në veri, duke pretenduar se Moska po përgatiste një ofensivë të re nga atje. Kremlini e mohoi këtë.
Rusia dhe aleati i saj më i vogël, Bjellorusia, zhvilluan stërvitje bërthamore ditë më parë, më 18 maj, ndërsa Kievi përshkallëzoi sulmet e tij me dronë ndaj Rusisë.
Bjellorusia, e cila kufizohet me krahun lindor të NATO-s, strehon raketën më të fundit të Rusisë me aftësi bërthamore, Oreshnik.
