Prokuroria Themelore në Prishtinë ka njoftuar se, në koordinim me Policinë e Kosovës, përkatësisht Drejtorinë për Hetimin e Krimeve Ekonomike dhe Korrupsionit, ka arrestuar një person të dyshuar për keqpërdorim dhe mashtrim në një aktivitet prokurimi për furnizime me pajisje në Policinë e Kosovës.
Sipas njoftimit, i dyshuari me inicialet N.R. po hetohet për veprat penale “Keqpërdorimi dhe Mashtrimi në Prokurim Publik” dhe “Falsifikimi i dokumenteve”.
Arrestimi është realizuar nga Policia e Kosovës, ndërsa me urdhër të prokurorit të shtetit, personi i dyshuar është ndaluar për 48 orë.
Prokuroria Themelore në Prishtinë ka bërë të ditur se, në bashkëpunim me institucionet përkatëse, do të vazhdojë ndërmarrjen e veprimeve të nevojshme hetimore në përputhje me ligjin.
