Rusia po shqyrton uljen e moshës së punës në 12 vjeç dhe rikthimin e kampeve të punës së fëmijëve në stilin sovjetik për të lehtësuar mungesën e fuqisë punëtore të shkaktuar nga lufta në Ukrainë.Propozimi u paraqit nga Komisionerja Ruse për të Drejtat e Fëmijëve, Olga Yaroslavskaya , e cila beson se të rinjtë duhet të kenë mundësinë të punojnë gjatë pushimeve shkollore sepse, siç pohon ajo, “pothuajse të gjithë duan të punojnë gjatë verës”.
Në një intervistë me radion Ju flet Moskva, ajo deklaroi: “Më duket se kthimi i kampeve të punës është një skenar realist që fëmijët tanë do ta mbështesin.”
Si argument, Yaroslavskaya përmendi përvojën e saj nga një kamp të rinjsh sovjetik. “Në klasën e 7-të, na çuan për të pastruar domatet në 40 gradë në një kazermë në mes të një fushe. Ne mbijetuam dhe unë solla në shtëpi 120 rubla”, u mburr komisioneri.
Ekonomistët paralajmërojnë se mungesa e fuqisë punëtore në Rusi është aq e rëndë sa kërcënon një ngadalësim afatgjatë të ekonomisë që tashmë është në vështirësi. Sipas legjislacionit rus të punës, fëmijët mund të punojnë që nga mosha 14 vjeç me pëlqimin me shkrim të prindërve të tyre ose të nënshkruajnë një kontratë pune në mënyrë të pavarur që nga mosha 15 vjeç.
Mungesë e madhe e punëtorëve
Edhe pse Presidenti rus Vladimir Putin krenohet me një shkallë papunësie rekord të ulët prej rreth dy përqind, mungesa e fuqisë punëtore i ka detyruar punëdhënësit të rrisin pagat për të tërhequr punonjës. Kjo rrit kostot për konsumatorët dhe zvogëlon fitimet e korporatave. Sipas vlerësimeve të Bloomberg, ekonomia ruse ka nevojë për rreth 1.5 milion punëtorë për të balancuar tregun e punës, ndërsa Unioni Rus i Industrialistëve dhe Sipërmarrësve parashikon një mungesë prej deri në tre milion punëtorësh deri në vitin 2030.
Kriza u shkaktua nga tre goditje të njëkohshme: një shkallë rekord e ulët lindjeje, emigrimi i deri në një milion profesionistëve të rinj, kryesisht të arsimuar, që iknin nga mobilizimi dhe shkalla jashtëzakonisht e lartë e vdekshmërisë së të rinjve në front. Numri i ushtarëve rusë të vrarë dhe të plagosur vetëm në Ukrainë vlerësohet në 1.5 milion.
“Nuk kemi përjetuar kurrë një mungesë të tillë punëtorësh në historinë moderne ruse. Nuk kemi pasur kurrë diçka të tillë”, tha në prill Elvira Nabiullina, guvernatorja e bankës qendrore ruse .
Fëmijë për luftë, fëmijë për punë
Propozimi për kampet e punës nuk është lajmi i vetëm që prek fëmijët rusë këtë javë. Ministria e Arsimit e Moskës ka njoftuar një listë të detyrueshme leximi veror për nxënësit e shkollës, e cila përfshin tekste që lavdërojnë luftën dhe ushtarët që pushtojnë Ukrainën, raporton Telegraph .Ndër titujt e rinj janë Hijet e Donbasit: Tregime të Vogla nga Lufta e Madhe, një përmbledhje me tregime rreth ushtarëve rusë dhe anëtarëve të forcave pro-ruse të cilët, thuhet se “kapërcenë vështirësitë që u ranë”, dhe libri Donbasi: Zemra e Rusisë, i cili përshkruan “gjakderdhjen tragjike” në rajonin e Donetskut të Ukrainës, duke pretenduar se zona i përket Moskës.
