Instituti “GAP”, në ndarjet buxhetore për vitin 2023, ka theksuar se Qeveria po favorizon komunat e pakta ku udhëheq, duke ua ndarë më shumë se gjysmën e buxhetit të planifikuar për investimet e reja kapitale. Kjo praktikë po ndiqet nga çdo qeveri, vlerësojnë edhe përfaqësues të Organizatës “Fol”.
Instituti “GAP”, vlerëson se qeveria Kurti po favorizon komunat e menaxhuara nga Lëvizja Vetëvendosje, në ndarjen e buxhetit për investimet e reja kapitale.
Siç thuhet në publikimin e fundit, nga 51.2 milionë euro investime kapitale të reja të nivelit qendror këtë vit, 22 milionë euro janë destinuar për projekte specifike në komuna:12 milionë euro do të orientohen te komunat e udhëhequra nga Vetëvendosje, përderisa në komunat e udhëhequra nga LDK dhe PDK, është ndarje e balancuar e buxhetit ndërsa komunat e udhëhequra nga AAK, do të përfitojnë vetëm 1 për qind të investimeve të reja kapitale nga niveli qendror, thuhet në analizën e GAP-it.
Se kjo praktik po ndiqet nga çdo qeveri në pushtet, duke favorizuar komunat me të cilat udhëheqin, e thotë edhe Mexhide Demolli- Nimani, nga Organizata “FOL”.
“Siç ka ndodhur edhe në vitet e kaluara, partia në pushtet gjithmonë ka favorizuar komunat me të cilat kanë pasur pushtetin. Një gjë e tillë po vazhdon edhe me partinë aktuale në pushtet, gjë të cilën e kanë luftuar sa kanë qenë në opozitë, mirëpo edhe këta nuk po bëjnë dallim dhe po vazhdon avazi i vjetër për sa i përket ndarjeve buxhetore”, thotë Demolli- Nimani.
“Mendoj se një gjë e tillë duhet të bëhet në mënyrë proporcionale, dhe assesi të favorizohen komunat kur veç e dimë që janë dy komuna të vogla me të cilat qeverisë VV në nivel lokal, dhe ato të favorizohen në krahasim me komunat që kanë një numër shumë të madh të banorëve”, deklaroi Demolli- Nimani për Radio Kosovën. “Vërtetë nuk është e drejtë!”
Por, për këtë ka reaguar, ministri i Financave, Punës dhe Transfereve, Hekran Murati.
Sipas tij, shumica e buxhetit për projektet e reja kapitale, është shpërndarë proporcionalisht dhe barabartë nëpër të gjitha komunat.
Sidoqoftë, sipas Institutit “GAP”, shpenzimet buxhetore në vitin 2023 parashihet të jenë rreth 3.2 miliardë euro, që shënon një rritje prej 464 milionë eurosh krahasuar me vitin 2022.
