Mijëra banorë të Stambollit protestuan për të dytën ditë radhazi në mbështetje të kryebashkiakut të qytetit, Ekrem Imamoglu. Më herët gjykata e dënoi me dy vjet e shtatë muaj burg për fyerje ndaj përfaqësuesve të Komisionit Qendror të Zgjedhjeve.
Akuzat ndaj Imamoglut kanë të bëjnë me zgjedhjet për kryetar bashkie në Stamboll të vitit 2019. Më pas politikani fitoi zgjedhjet e para, të cilat u mbajtën më 31 mars, por u anuluan nga KQZ, dhe të dytat më 23 qershor. Pas fitores Imamoglu i quajti “budallenj” ata që anuluan zgjedhjet e 31 marsit.
Dënimi u shty disa herë, por më 14 dhjetor gjykata dha vendimin e saj. Përveç dënimit me burg, gjyqtari i ndaloi Imamoglut të merrej me aktivitete politike.
Kryebashkiaku opozitar i Stambollit dënohet me burg
Imamoglu konsiderohet si një rival i mundshëm i Rexhep Tajip Erdogan në zgjedhjet presidenciale të vitit 2023. Nëse vendimi i gjykatës hyn në fuqi, politikani do të shkarkohet nga posti i tij si kryebashkiak i Stambollit dhe do t’i ndalohet pjesëmarrja në zgjedhje.
Vendimi nuk është ende përfundimtar, kërkon miratim në shkallën e apelit dhe mund të apelohet, përfshirë edhe në Gjykatën Kushtetuese të Turqisë.
