Një shtetas australian është arrestuar në Tajlandë në lidhje me zbulimin e trupit të një vajze 17-vjeçare në një valixhe, njoftuan autoritetet lokale sot, të shtunën.
I dyshuari, “i cili vazhdon të mohojë akuzat” kundër tij, “u la në paraburgim pas marrjes në pyetje”, tha një zyrtar i policisë së Pattayas për AFP-në.
Policia po pret rezultatet e autopsisë, si dhe prova të tjera, përpara se të ngrejë akuza për “rrëmbim të një të mituri për qëllime seksuale” , “vrasje me dashje” dhe “fshehje të një kufome” , shpjegoi ai.
Sipas mediave lokale, 46-vjeçari australian u arrestua mbrëmë në Aeroportin Ndërkombëtar Suvarnabhumi të Bangkokut, ndërsa po përpiqej të blinte një biletë avioni për në Perth.
Një rrjet lajmesh lokal publikoi fragmente nga marrja e tij në pyetje, ku ai duket se pranon vrasjen, duke konfirmuar megjithatë se veproi në vetëmbrojtje, pasi adoleshenti e kërcënoi me thikë.
«Më vjen keq për atë që i ndodhi vajzës suaj, ishte përtej kontrollit tim», tha ai, duke iu drejtuar prindërve të viktimës.
Në imazhet e kamerave me qark të mbyllur, ai shihet duke hyrë, i shoqëruar nga një grua 17-vjeçare tajlandeze, brenda një ndërtese në vendpushimin turistik të Pattayas natën e së mërkurës ndaj të enjtes.
Pastaj, disa orë më vonë, ai është filmuar duke u larguar vetëm duke mbajtur një valixhe të madhe të zezë, të cilën e mban në pjesën e pasme të një skuteri.
Policia e gjeti valixhen të nesërmen pranë shinave të trenit dhe brenda zbuloi trupin e gruas së re, me lëndime të dukshme, shkroi gazeta Pattaya News.
