Shefi i EULEX-it, Lars-Gunnar Wigemark, ka bërë të ditur se ky mision i është përgjigjur pozitivisht kërkesës së Policisë së Kosovës për furnizim me ushqime dhe veshmbathje për zyrtarët në pikën kufitare Jarinja.
“Kam kënaqësinë t’ju informoj se me kërkesë të Policisë së Kosovës, EULEX-i ka dorëzuar furnizime thelbësore, përfshirë ushqime, veshmbathje dhe produkte higjienike, oficerëve të Policisë së Kosovës në pikën kufitare Rudnica/Jarinje më 17 dhjetor”, ka shkruar Wiegermer në Twitter.
Policia e Kosovës (PK) ka njoftuar sot se nëntë pjesëtarë të saj janë transportuar nga pikat kufitare në veri të vendit në jug të Kosovës falë bashkëpunimit me misionin e KFOR-it.
“Policia e Kosovës mban bashkëpunim dhe kontakte të vazhdueshme me KFOR-in, i cili sot ka mbështetur transportin e nëntë policëve, të cilët janë transportuar nga veriu në jug për shkaqe shëndetësore kronike”, tha zëdhënësi i PK-së, Baki Kelani.
Pjesëtarët e PK-së në vendkalimin Jarinje dhe stacionin policor në Leposaviq janë bllokuar për 11 ditë nga barrikadat që janë vendosur në fshatin Rudare të komunës së Zveçanit.
