Të paktën 28 persona humbën jetën në një zjarr në një fabrikë këpucësh në Kinën juglindore të enjten, njoftoi agjencia shtetërore e lajmeve Xinhua, pasi flakët përfshiu një ndërtesë të lartë dhe bllokuan punëtorët në çati.Zjarri shpërtheu rreth mesditës sipas kohës lokale në qytetin Jinjiang në provincën Fujian, në fabrikën e këpucëve Huiteng.
Një total prej 239 personash ndodheshin në fabrikë kur shpërtheu zjarri, raportoi Xinhua. Ajo tha se 213 persona u evakuuan, dy prej të cilëve vdiqën pasi u dërguan në spital për trajtim.
Videot e publikuara nga media shtetërore treguan flakë që përfshinin ndërtesën dhe tym të dendur e të zi që ngrihej në qiell. Rreth një duzinë njerëz mund të shiheshin në çati.
Presidenti kinez Xi Jinping lëshoi udhëzime duke kërkuar një përpjekje gjithëpërfshirëse shpëtimi. Ai tha se zjarri vjen pas një vargu aksidentesh fatale në fabrikat e prodhimit në vend gjatë muajve të fundit. Xi u bëri thirrje autoriteteve të sanksionojnë ashpër ata që janë përgjegjës.
Jinjiang, në provincën bregdetare të Fujian, është një qendër e rëndësishme për prodhimin e këpucëve dhe veshjeve dhe shpesh quhet “qyteti i këpucëve” i Kinës. Mijëra kompani prodhuan më shumë se 1.2 miliardë palë këpucë në vitin 2024, duke përbërë 20 përqind të prodhimit global, sipas shifrave zyrtare.
Gjetjet paraprake tregojnë se zjarri shpërtheu në katin përdhes të fabrikës, tha një zyrtar lokal për CCTV. Materialet e prodhimit të këpucëve të ruajtura në ndërtesë ishin shumë të ndezshme dhe mund të kishin shkaktuar përhapjen e shpejtë të zjarrit, tha zyrtari.
