Dy persona, të kërkuar me urdhërarrest ndërkombëtar për vepra penale që lidhen me narkotikë, janë ekstraduar nga Gjermania dhe Hungaria drejt Kosovës.
Policia e Kosovës ka njoftuar se ekstradimet janë realizuar nga Drejtoria për Bashkëpunim Ndërkombëtar Policor, në koordinim me njësitet relevante të Policisë dhe institucionet e drejtësisë.
Më 12 gusht 2026, nga Gjermania në Kosovë është ekstraduar shtetasi i Kosovës M.T., i cili kërkohej me urdhërarrest ndërkombëtar për veprën penale “Blerja, posedimi, shpërndarja edhe shitja e paautorizuar e narkotikëve, substancave psikotrope dhe analoge”.
Pas ekstradimit, i dyshuari u është dorëzuar njësive përkatëse të Policisë në DRP Prishtinë për procedura të mëtejshme ligjore.
Ndërkaq, më 13 gusht 2026, nga Hungaria në Kosovë është ekstraduar shtetasi i Serbisë I.S., i cili po ashtu kërkohej me urdhërarrest ndërkombëtar për të njëjtën vepër penale.
Edhe ai, pas ekstradimit, u është dorëzuar njësive përkatëse të Policisë në DRP Prishtinë për procedura të mëtejshme ligjore.
Sipas Policisë, ekstradimet u mundësuan falë bashkëpunimit ndërmjet institucioneve të Kosovës dhe dy shteteve në fjalë.
Policia e Kosovës ka bërë të ditur se përmes Drejtorisë për Bashkëpunim Ndërkombëtar Policor (ILECU) do të vazhdojë shkëmbimin e informacioneve me institucionet vendore, shtetet partnere dhe organizatat ndërkombëtare për parandalimin, hetimin dhe zbulimin e aktiviteteve kriminale, si dhe lokalizimin dhe arrestimin e personave apo grupeve kriminale që veprojnë brenda dhe jashtë vendit.
