Gjykata Themelore e Prizrenit ka bërë të ditur se ia ka caktuar masën e paraburgimit prej një muaji personit që ka kanosur kryetarin e Komunës së Prizrenit, Shaqir Totaj.
Në njoftimin e Gjykatës thuhet se i dyshuari ka kanosur kryetarin Totaj, për shkak të një mosmarrëveshje paraprake lidhur me një kontest pronësor.
“I pandehuri F.K.,me datë 24 janar 2023, me qëllim të frikësimit dhe shkaktimit të ankthit, seriozisht e kanos personin zyrtar në lidhje me punën e tij zyrtare dhe atë të dëmtuarin Sh.T.,– Kryetar i Komunës së Prizrenit, në atë mënyrë që për shkak mosmarrëveshjeve paraprake në lidhje me një kontest pronësor me komunën e Prizrenit, i pandehuri F.K., ditën kritike përmes një personi të tretë, i dërgon porosi djalit të të dëmtuarit me fjalët se “thuaj djalit të Kryetarit le t’i thotë babës vet le të ndalet sepse nëse ai nuk ndalet edhe ma rrezon shtëpinë unë djalin e tij ose e rrahi ose e mys krejt”, me çka me këtë veprim tek i dëmtuari Sh.T., dhe familja e tij ka shkaktuar frikë, ankth dhe pasiguri për jetë”, shkruan në njoftim.
Sipas Gjykatës edhe me 06 dhjetor 2022, ndaj të pandehurit është iniciuar hetim për veprën penale të natyrës së njëjtë kanosje ndaj të dëmtuarit kryetarit të Komunës së Prizrenit, dhe i pandehuri është edhe përsëritës i veprave penale në tre aktgjykime të plotfuqishme.
Gjykata ka ardhur në përfundim se caktimi i masës së paraburgimit në këtë fazë është i domosdoshëm dhe i arsyeshëm, me qëllim të parandalimit të përsëritjes së veprës penale, apo me qëllim të parandalimit të kryerjes së ndonjë vepre edhe më të rëndë penale.
